અમદાવાદ-મુંબઈ બુલેટ ટ્રેન પ્રોજેક્ટને લઈને દક્ષિણ ગુજરાત માટે મહત્વપૂર્ણ સમાચાર સામે આવ્યા છે. નેશનલ હાઈ સ્પીડ રેલ કોર્પોરેશન લિમિટેડ (NHSRCL) દ્વારા સુરત-બીલીમોરા એલિવેટેડ સેક્શનમાં આગામી 20 નવેમ્બર, 2026થી અથવા ત્યારબાદ ગમે ત્યારે ઓવરહેડ ઇલેક્ટ્રિકલ વાયરોમાં હાઈ-વોલ્ટેજ વીજપ્રવાહ શરૂ કરવાની તૈયારી કરવામાં આવી છે. આ જાહેરાતને પગલે પ્રોજેક્ટની આસપાસ રહેતા નાગરિકો અને સામાન્ય જનતા માટે વિશેષ સાવચેતીની સૂચના જારી કરવામાં આવી છે.
ઓવરહેડ વાયરોને હંમેશાં જીવંત માનીને ચાલવા અપીલ
NHSRCL દ્વારા જાહેર કરાયેલી સુરક્ષા સૂચના અનુસાર, 20 નવેમ્બરથી સુરત-બીલીમોરા સેક્શનના ઓવરહેડ ઇલેક્ટ્રિકલ વાયરોમાં વીજપ્રવાહ શરૂ થઈ શકે છે. તેથી નાગરિકોએ આ વાયરોને હંમેશાં વીજપ્રવાહિત એટલે કે જીવંત માનવા અને તેની નજીક જવાનું ટાળવા અપીલ કરવામાં આવી છે.
તંત્ર દ્વારા સ્પષ્ટ કરવામાં આવ્યું છે કે બુલેટ ટ્રેન પ્રોજેક્ટના ઇલેક્ટ્રિકલ ઇન્સ્ટોલેશનની આસપાસ કોઈપણ બિનઅધિકૃત વ્યક્તિએ કામ કરવું નહીં. ખાસ કરીને બાંધકામ, સમારકામ કે અન્ય કામગીરી દરમિયાન સુરક્ષાના નિયમોનું પાલન કરવું અનિવાર્ય છે. બેદરકારી ગંભીર અકસ્માતનું કારણ બની શકે છે.
508 કિલોમીટરના કોરિડોર માટે 14 ટ્રેક્શન સબસ્ટેશન
અમદાવાદ-મુંબઈ વચ્ચેના કુલ 508 કિલોમીટર લાંબા હાઈ-સ્પીડ રેલ કોરિડોરને અવિરત અને સુરક્ષિત વીજપુરવઠો મળી રહે તે માટે કુલ 14 ટ્રેક્શન સબસ્ટેશન સ્થાપિત કરવાની યોજના છે. જેમાં પાંચ સબસ્ટેશન મહારાષ્ટ્રમાં અને નવ ગુજરાતમાં કાર્યરત થવાના છે.
આ સબસ્ટેશનો બુલેટ ટ્રેનની હાઈ-સ્પીડ કામગીરી માટે જરૂરી વીજળી પૂરી પાડવામાં મહત્વપૂર્ણ ભૂમિકા ભજવશે.
2027માં ટ્રાયલ અને કમર્શિયલ સેવા શરૂ કરવાનું લક્ષ્ય
દેશની પ્રથમ બુલેટ ટ્રેન શરૂ કરવાના આયોજન અંતર્ગત પ્રોજેક્ટના વિવિધ તબક્કાઓની કામગીરી આગળ વધી રહી છે. અગાઉના આયોજન મુજબ મે-જૂન 2027 દરમિયાન હાઈ-સ્પીડ ટ્રેક પર ટ્રાયલ રન હાથ ધરવાનું અને ઓગસ્ટ 2027 સુધીમાં પ્રથમ તબક્કામાં કમર્શિયલ સેવા શરૂ કરવાનું લક્ષ્ય રાખવામાં આવ્યું છે.
દક્ષિણ ગુજરાત માટે વિકાસનું નવું સીમાચિહ્ન
સુરત-બીલીમોરા સેક્શનમાં વીજપ્રવાહ શરૂ કરવાની તૈયારી બુલેટ ટ્રેન પ્રોજેક્ટની દિશામાં મહત્વપૂર્ણ ટેક્નિકલ તબક્કો માનવામાં આવે છે. મુંબઈ-અમદાવાદ હાઈ-સ્પીડ રેલ કોરિડોર શરૂ થયા બાદ દેશના પરિવહન ક્ષેત્રમાં આધુનિક ટેક્નોલોજી અને ઝડપી મુસાફરીનો નવો અધ્યાય ઉમેરાશે.
નાગરિકોને ખાસ અપીલ
20 નવેમ્બરથી અથવા ત્યારબાદ ગમે ત્યારે ઓવરહેડ વાયરોમાં હાઈ-વોલ્ટેજ વીજપ્રવાહ શરૂ થઈ શકે છે. તેથી બુલેટ ટ્રેનના ટ્રેક, વીજવાયરો, થાંભલાઓ અને ઇલેક્ટ્રિકલ ઇન્સ્ટોલેશનથી સુરક્ષિત અંતર જાળવો. કોઈપણ પ્રકારની ચેડાં કે બિનઅધિકૃત કામગીરી ન કરો. તમારી એક નાની બેદરકારી ગંભીર અકસ્માતનું કારણ બની શકે છે.