Month: December 2019

આઠ લાખની લાંચ લેનાર જેતપુરના તત્કાલીન ડીવાયએસપી જે.એમ. ભરવાડને ફરજ મોકુફ હેઠળ મુકવાનો ગુજરાત સરકારના ગૃહ વિભાગે આદેશ કર્યો છે. તેની વિરૂદ્ધ રાજકોટ એસીબીમાં ભ્રષ્ટાચાર નિવારણ અધિનિયમ 1988 (સુધારા અધિનિયમ 2018)ની કલમ 7, 12, 13(1) મુજબ ગુનો નોંધાયો હતો. જે.એમ. ભરવાડ વતી કોન્સ્ટેબલ વિશાલકુમાર ગોવિંદભાઇ સોનારાએ ફરિયાદી પાસેથી આઠ લાખ રૂપિયાની લાંચ ત્રીજી ઓગસ્ટના રોજ આવકાર હોટલ, ધોરાજીમાં સ્વીકારી હતી. આથી 23 ડિસેમ્બરના ગુજરાત સરકારના ગૃહ વિભાગના આદેશ મુજબ ફરજ મોકુફ હેઠળ મુકવામાં આવ્યા છે. ફરજ મોકુફી દરમિયાન તેનું મુખ્ય મથક પોલીસ અધિક્ષકની કચેરી છોટા ઉદેપુર રાખવામાં આવ્યું છે.

લાંચ કેસમાં નામ ખુલતા જ જે.એમ. ભરવાડ ત્રણ મહિના સુધી ફરાર થયા હતા. બાદમાં સુપ્રિમ કોર્ટમાંથી આગોતરા જામીન મેળવ્યા બાદ જે.એમ. ભરવાડ રાજકોટ એસીબીમાં હાજર થઈ પોતાનું નિવેદન નોંધાવ્યું હતું. અમદાવાદ એસીબી દ્વારા કોન્સ્ટેબલ વિશાલ સોનારાને આઠ લાખ રૂપિયાની લાંચની રકમ સાથે ઝડપી પાડવામાં આવ્યો હતો. જેમાં સહ આરોપી તરીકે જેતપુરના ડીવાયએસપી ભરવાડનું નામ પણ ખૂલ્યું હતું.

સુરતના સૌથી વધુ ચકચારી દિશીત જરીવાલાની હત્યામાં આજે પુરાવાના અભાવે કોર્ટે પત્ની વેલ્સી, પ્રેમી સુકેતુ અને ડ્રાઇવર ધીરેન્દ્રસિંહને નિર્દોષ છોડી મૂકવાનો હુકમ કર્યો છે. આ કેસ હાઈપ્રોફાઈલ હોવાથી સુરતમાં ભારે ચર્ચામાં રહ્યો હતો. આજે આ કેસનો ચૂકાદો આવી જતાં મુખ્ય આરોપી ગણાતા હતા તેઓ નિર્દોષ જાહેર થયા છે. આ કેસમાં સાક્ષીઓ હોસ્ટાઇલ થઈ જતાં એડિશનલ સેશન્સ જજ ગોહિલે ફરિયાદ પક્ષ પુરાવો રજૂ કરવામાં નિષ્ફળ જતા શંકાનો લાભ આપી નિર્દોષ છોડી મૂકવા હુકમ કર્યો છે.
ચકચારી કેસમાં આજે એક કેસ કાર્યવાહી ચાલી જતા કોર્ટે શંકાનો લાભ આપી આરોપીઓને નિર્દોષ ઠરાવી છોડી મૂકવા હુકમ કર્યો છે. આ કેસની ફરિયાદ પક્ષે તપાસ પંચમાં તથા સાક્ષીઓ હોસ્ટાઇલ જાહેર થયા હતા જ્યારે આ કેસમાં નજરે જોનાર સાક્ષીઓ આ અન્ય સાક્ષીઓ તેઓ હોસ્ટાઇલ જાહેર થતા પુરાવાના અભાવે છોડી મુકવામાં આવ્યાં છે.

આ કેસની વિગત મુજબ 27 જૂન 2016ના રોજ સુરતના પાર્લેપોઈન્ટ વિસ્તારમાં આવેલી સર્જન સોસાયટીમાં દિશિત જરીવાલાની હત્યા તેની પત્ની વેલ્સી જરીવાલાના ઈશારે તેના પ્રેમી સની ઉર્ફે સુકેતુ હર્ષદભાઈ મોદી અને તેના ડ્રાઈવર ધીરેન્દ્રસિંહ જબરસિંહ ચૌહાણે કરી નાંખી હતી અને કોઇને જાણ ન થાય તે માટે પોલીસમાં લૂંટની ફરિયાદ નોંધાવી હતી. જોકે, પોલીસે ગણતરીના દિવસોમાં જ વેલ્સી, સુકેતુ અને ધીરેન્દ્રને જેલના હવાલે કરી દીધા હતા.

વેલ્સી અને સુકેતુ લગ્ન અગાઉથી જ એકબીજાના પ્રેમમાં હતાં. પરંતુ દૂર દૂર પણ લોહીના સંબંધમાં ભાઈ બહેન થતાં હોવાથી બન્નેના લગ્ન થઈ શક્યા નહોતા. જેથી સુકેતુ અને વેલ્સીના અલગ-અલગ લગ્ન થઈ ગયાં હતાં. વેલ્સી અને સુકેતુ પોત પોતાના લગ્ન જીવનથી ખુશ નહોતા. બીજી તરફ છેલ્લા ઘણા સમયથી સુકેતુની પત્ની પણ તેને છોડી પિયર જતી રહી હતી. જેથી સુકેતું અને વેલ્સીને ફરી એક થવા માટે દિશીતનો કાંટો કાઢી નાખવાનો પ્લાન બનાવ્યો હતો.

કેસમાં શરૂઆતમાં વેલ્સી ફરિયાદી બની હતી અને પોલીસે લૂંટ વિથ મર્ડરની થીયરી પર તપાસ આગળ વધારી હતી. તપાસ દરમિયાન વેલ્સીના ચહેરા પરથી નકાબ ચિરાતો ગયો ને હત્યાકાંડમાં પોલીસનો સકંજો પ્રેમી સુકેતુ અને ડ્રાઇવર ધીરેન્દ્ર સુધી પહોંચ્યો હતો. આથી પોલીસે ત્રણેયની ધરપકડ કરી હતી. ચકચારી દિશીત જરીવાલા હત્યા કેસના આરોપી સુકેતુ મોદી, દિશીતની પત્ની વેલ્સી અને ડ્રાઇવર ધર્મેન્દ્ર સહિતના આરોપીઓ સામે પોલીસે કોર્ટમાં ચાર્જશીટ રજૂ કરી હતી. આ કેસમાં આરોપી સુકેતુથી જુદી રહેતી પત્ની સાક્ષી બની હતી. મૂળ 15 પાનાની ચાર્જશીટ ઉપરાંત કોલ ડિટેઇલ અને 108 પંચોની વિગતો હતી. આમ, પુરાવા સાથેની માહિતી કુલ 238 પાનાની હતી.

એક વખતના હોકીમાં નેશનલ પ્લેયર રહેલા અને રાજકોટના પોલીસ હેડ ક્વાટર્રમાં રહેતા થોરાળાના કોન્સ્ટેબલે ગઈ મોડી રાત્રે પંખામાં દુપટ્ટો બાંધી ગળેફાંસો ખાઈ આપઘાત કરી લેતા બ્રાહ્મણ પરિવાર શોકમાં ગરકાવ થઇ ગયો છે. લગ્નજીવનના સાત વર્ષ દરમિયાન પત્નીને બબ્બે વખત કસૂવાવડ થતા તે સતત ચિંતાતુર રહેતો હતો અને તેના કારણે જ આ પગલું ભરી લીધું હોવાની પરિવારજનોએ શંકા વ્યક્ત કરી છે.

ગઈ રાત્રે ખુરશીનો અવાજ આવતા પત્નીએ ઉઠીને જોતા પતિનો લટકતો મૃતદેહ જોવા મળ્યો હતો સ્પોટ્‌ર્સ કોટામાં ભરતી પામેલા આશીષ દવે હોકીમાં નેશનલ સુધી રમી ચુક્યા છે તેમાં તેના રેન્ક પણ સારા હતા. તેમને ગાર્ડ ઓફ ઓનર અપાયું હતું. રાજકોટ શહેરના પોલીસ હેડ ક્વાટર્રમાં ચાર માળના બ્લોક નંબર-52માં રહેતા અને થોરાળા પોલીસ સ્ટેશનમાં કોન્સ્ટેબલ તરીકે ફરજ બજાવતા આશિષ દીપકભાઈ દવે નામના 31 વર્ષીય પોલીસેમેને ઘરમાં મોડી રાત્રે ગળેફાંસો ખાઈ લીધો હોય તે અંગે કંટ્રોલ મારફતે જાણ કરાતા પ્રનગર પોલીસ સ્ટેશનના એએસઆઇ સુરેશભાઈ જોગરાણા સહિતનો સ્ટફ દોડી ગયો હતો અને જરૂરી કાર્યવાહી હાથ ધરી હતી.

આપઘાતના આ બનાવ અંગે મૃતક આશિષ દવેના નાથદ્વારામાં રહેતા કાકા રમેશભાઈ દવેએ માહિતી આપતા જણાવ્યું હતું કે આશિષ અને તેમની પત્ની અંજલીબેન હેડ ક્વાટર્રમાં રહે છે તેમનો મોટોભાઈ હિરેન અહીં નાથદ્વારામાં રહે છે. ગત રાત્રે દંપતી સુઈ ગયા બાદ આશિષ મોડી રાત્રે એકાદ વાગ્યે ઉઠીને બાજુમાં રૂમમાં ગયો હતો અને પંખામાં દુપટ્ટો બાંધી ગળેફાંસો ખાઈ લીધો હતો. ખુરશી પટકાવવાનો અવાજ આવતા પત્ની અંજલીબેનની ઊંઘ ઉડતા તેણે બાજુના રૂમમાં જઈને જોતા પતિનો લટકતો મૃતદેહ જોઈ ભાંગી પડી હતી. પાડોશીઓ અને પરિવારજનોને જાણ કરતા બધા દોડી આવ્યા હતા. ત્યાર બાદ 108ને જાણ કરતા 108નો સ્ટાફ પણ દોડી આવ્યો હતો. પરંતુ ઇએમટી ચિરાગભાઈએ જોઈ તપાસી મૃત જાહેર કર્યા હતા.

આશિષ દવેના પિતા પણ એએસઆઇ તરીકે પોલીસમાં ફરજ બજાવતા હતા. દવે પરિવાર મૂળ લખતરનો છે. આશિષ દવે સ્પોટ્‌ર્સ કોટામાંથી પોલીસમાં ભરતી થયા હતા તેઓ હોકીની રમતમાં નેશનલ સુધી રમી આવ્યા છે તેમાં તેને સ્પોટ્‌ર્સના સારા રેન્ક હોવાથી સાત વર્ષ પૂર્વે થોરાળા પોલીસ સ્ટેશનમાં ભરતી થઇ પોલીસની નોકરીની શરૂઆત કરી હતી ત્યારથી તેઓ ત્યાં જ ફરજ બજાવતા હતા. લગ્નના સાત વર્ષ થઇ ગયા હતા અને બબ્બે વખત પત્નીની કસૂવાવડ થઇ ગઈ હોવાથી પોતે સંતાન નહીં થતા હોય ચિંતાતુર રહેતો હતો અને તેને લીધે જ આ પગલું ભરી લીધું હોવાની શંકા દર્શાવાઈ છે. આશાસ્પદ યુવાનના મોતથી બ્રાહ્મણ પરિવાર શોકમાં ગરકાવ થઇ ગયો છે. સાથે નોકરી કરતા કર્મચારીઓ અને અધિકારીઓ પણ સ્તબ્ધ થઇ ગયા છે મૃતદેહ અંતિમવિધિ માટે રેલનગરમાં રહેતા ભાઈને ત્યાં લઇ ગયા હોય પોલીસ વિભાગ દ્વારા ગાર્ડ ઓફ ઓનર અપાયું હતું.

આપઘાત કરી જિંદગીનો અંત આણી લેનાર આશિષ દવેએ થોરાળા પોલીસ સ્ટેશનમાંથી ફરજ ઉપરથી બે દિવસની સીક્લીવ લીધી હતી. પત્ની બીમાર હોવાનું જણાવી સીક્લીવ ઉપર હોવાનું જાણવા મળ્યું છે મૃતક આશિષ દવે ભોળાનાથના પરમ ભક્ત હતા તેઓ દરરોજ પોતાના મોબાઈલ સ્ટેટ્‌સમાં રામનાથ મહાદેવના ફોટા અપલોડ કરતા હતાં.

કેન્દ્ર સરકાર દ્વારા સ્વચ્છતા અંગે કરવામાં આવેલા સરવેમાં સુરતે ફરી એક વાર બાજી મારી છે. અત્યાર સુધી સ્વચ્છતાને લઈ સુરતે દેશના અન્ય શહેરોને પાછળ ધકેલી દીધા છે. સુરત ઉપરાંત રાજકોટે પણ સ્વચ્છતામાં મેદાન માર્યું છે.

કેન્દ્ર સરકારના સ્વચ્છતા સર્વેક્ષણમાં સતત ચોથી વાર દેશના સૌથી સ્વચ્છ શહેર તરીકે ઈન્દોરની પસંદગી કરવામાં આવી છે. કેન્દ્ર સરકારના સ્વચ્છતા સર્વેક્ષણના એપ્રિલથી જૂનના પહેલા ક્વાર્ટરમાં ભોપાલ દેશમાં બીજા સ્થાને રહ્યું છે. જુલાઈથી સપ્ટેમ્બરના બીજા ક્વાર્ટરની વાત કરીએ તો રાજકોટ અંતિમ પરિણામોમાં બીજા સ્થાને છે.

આ ઉપરાંત 10 લાખ કરતા ઓછી વસ્તીવાળા શહેરોની શ્રેણીમાં જમશેદપુર પ્રથમ ક્રમે આવ્યું. સરવેના પ્રથમ ક્વાર્ટરમાં સુરત અને બીજા ક્વાર્ટરમાં નવી મુંબઈને સ્થાન આપ્યું હતું. તમને જણાવી દઈએ કે કેન્દ્ર સરકાર દ્વારા કરાયેલા સરવેના પરિણામો મંગળવારે જાહેર કરાયા હતા.

ભારત સરકારે બીજી ઓક્ટોબર 2014 ના રોજ સ્વચ્છ ભારત અભિયાનની શરૂઆત કરી હતી. હવે તેના પાંચ વર્ષ પૂરા થઈ ગયા છે. આ સમયગાળા દરમિયાન સ્વચ્છતાને દેશભરમાં જન આંદોલન બનાવવાના કેન્દ્ર સરકારના પ્રયત્નોએ પણ તેની અસર દેશના ઘણા શહેરોમાં જોવા મળી રહી છે.

ગુજરાતભરમાં જિલ્લા-તાલુકા પંચાયતોમાં ખાલી પડેલી બેઠકો માટે થયેલી પેટા ચૂંટણીની મત ગણતરી કરવામાં આવી હતી. પેટાચૂંટણીમાં ભાજપનો વિજય ડંકો થયો છે તો કેટલીક બેઠકો કોંગ્રેસે જીતી લીધી છે. અમદાવાદ જિ.પં.ની ત્રણમાંથી બે બેઠકો પર કોંગ્રેસનો વિજય થયો છે. ભાજપે દાવો કર્યો છે જિલ્લા અને તાલુકા પંચાયતની 33 સીટની ચૂંટણીમાં ભાજપનો 29 સીટ પર વિજય થયો છે.

અમદાવાદ જિલ્લા ૫ચાયતની બે અને તાલુકા પંચાયતોની 27 બેઠકનું પરિણામ જાહેર થયા. જિલ્લાના ત્રણ મુખ્ય મથકોએ મતગણતરી હાથ ધરાઈ હતી. આ મતગણતરીના સ્થળો પર પોલીસનો ચાંપતો બંદોબસ્ત ગોઠવવામાં આવ્યો છે. અત્યાર સુધી આવેલા પરિણામના આંકડા પર નજર કરીએ તો, જિલ્લા અને તાલુકા પંચાયતની પેટા ચૂંટણીમાં ભાજપ આગળ ચાલી રહ્યું છે. કેટલીક બેઠકો પર ભાજપે જીત પણ મેળવી લીધી છે. પેટાચૂંટણીમાં શરૃઆતી પરિણામથી ભાજપમાં જશ્નનો માહોલ છવાયેલો છે.

જો કે, અમદાવાદ જિલ્લા પંચાયતની બે અને વિરમગામ તાલુકા પંચાયતની એક એમ મળીને કુલ ત્રણ બેઠકોની રવિવારે પેટા ચૂંટણી યોજાઈ હતી. આજે હેબતપુર, શિયાળ અને ઓગાણ બેઠકનું પરિણામ આવ્યું છે, જેમાં બે બેઠકો પર કોંગ્રેસે સત્તા કાયમ કરી છે. હેબતપુર અને શિયાળ બેઠકો પર કોંગ્રેસે ભાજપને હરાવ્યું છેે. અમદાવાદ જિલ્લા પંચાયતની શિયાળ બેઠક પર કોંગ્રેસનો વિજય થયો છે.

શિયાળ જિલ્લા પંચાયત બેઠક પર કોંગ્રેસના બાબુભાઈ પઢાર 1569 મતથી જીતી ગયા છે. આમ, શિયાળ બેઠક પર કોંગ્રેસનો કબજો જોવા મળ્યો છે. અમદાવાદમાં ઓગાણ તાલુકા પંચાયતની બેઠક પર ભાજપની જીત થઈ છે. વિષ્ણુભાઈ જાદવ ઓગાણ બેઠક પર 1384 મતથી જીતી ગયા છે. હેબતપુર બેઠક પર કોગ્રેસના નિરૃભાઈ ખસિયા 211 મતે જીત્યા છે. તિથોર બેઠક પર ભાજપના ઉમેદવારની જીત થઈ છે. ટિકર બેઠક પર ભાજપ ઉમેદવાર ગોવિંદ ગરચરની જીત થઈ છે.