Month: May 2019

ગુજરાતના આઈપીએસ અધિકારીઓના રિટાયરમેન્ટનું આ વર્ષે ખાસ્સું એવું લિસ્ટ છે. તેમાં સુરતના પોલીસ કમિશનર સતીષ શર્માનો પણ સમાવેશ થાય છે. સુરતના પોલીસ કમિશનર તરીકે કાર્યરત એવા સતીષ શર્મા સાડા ત્રણ વર્ષના કાર્યકાળમાં તેમની અનેકવિધ કામગીરીને સુરતીઓ સદા યાદ રાખશે.

14-10-2016માં સુરતના પોલીસ કમિશનર તરીકે કાર્યભાર સંભાળ્યા બાદ સતીષ શર્માએ સુરતની ટ્રાફીક સમસ્યા માટે વિશેષ ધ્યાન કેન્દ્રીત કર્યું હતું. આડેધડ ટ્રાફીક વ્યવસ્થાને સુચારું અને સરળ બનાવવા માટે તેમણે બેરીકેટ સહિત ટ્રાફીક ડાયવર્ઝનના પગલા ભર્યા અને તેનું પરિણામ સારું પણ મળી રહ્યું છે. ગમે ત્યાંથી ટ્રાફીકના નિયમોનો ભંગ કરી વાહનો હંકારતા વાહનચાલકોમાં ટ્રાફીક સેન્સ આવે તેના માટેના સમાંતર કાર્યક્રમો પણ કરવામાં આવ્યા છે.

આ ઉપરાંત ઈજાના 86 સાથે મૃત હાલતમાં મળી આવેલી બાળકીના કોઈ પણ કલ્યૂ વિનાના કેસમાં લાગલગાટ ઈનવેસ્ટીગેશન કરીને આરોપીઓને ઝડપી પાડવામાં સતીષ શર્માની ટીમ સફળ રહી હતી. આ કેસના કારણે સુરતના નામને કલંકિત કરવાનો પ્રયાસ કરવામાં આવ્યો હતો પરંતુ સુરતના પોલીસ કમિશનર સતીષ શર્માએ ગલીએ-ગલીએ અને મહોલ્લે-મહોલ્લે પોલીસને પોસ્ટર ચોંટાડવાથી લઈને પોલીસ વાનમાં બાળકીની ઓળખ માટેનું અભિયાન ચલાવ્યું હતું. આ અભિયાનના પરિણામ સ્વપરૂ બાળકી અને તેની માતાની હત્યા કરનારા આરોપીઓ સુધી પોલીસ પહોંચી શકી હતી.

સતીષ શર્માએ એમકોમ અને એલએલબી, પીજી ડિપ્લોમા સુધીનો અભ્યાસ રાજસ્થાનથી કર્યો છે. તેઓ 1986ન આઈપીએસ કેડરના અધિકારી છે. જ્યારે તેમણે આઈપીએસ અધિકારી તરીકે 25-8-1986માં જોડાયા હતા. 33 વર્ષની આઈપીએસ અધિકારી તરીકેની કામગીરીમાં સતીષ શર્માના લલાટે અનેક મહત્વપૂર્ણ કેસ ઉકેલવાના રેકોર્ડ નોંધાયેલા છે. 

(સૈયદ શકીલ દ્વારા): ગુજરાતમાંથી લોકસભાની ચૂંટણી પૂર્ણ થયા બાદ ગુજરાત કોંગ્રેસ રાજીવ ગાંધી ભવનમાં કેદ થઈ ગઈ હોવાનું લાગી રહ્યું છે. ગુજરાત સમસ્યાઓથી સળગી રહ્યું છે ત્યારે ગુજરાત કોંગ્રેસે લોકની સાથે રહેવાના બદલે ઈ-મેલીયા પ્રેસનોટ અને વ્હોટસઅપ મેસેજની ફરતે કુંડાળું કરી દીધું છે.

કોંગ્રેસ પ્રમુખ રાહુલ ગાંધીએ ગુજરાત કોંગ્રેસમાં પ્રાણ ફૂંકવામાં કોઈ કસર રાખી નથી. પરંતુ મહત્વની વાત એ છે કે ગુજરાત કોંગ્રેસે અત્યાર સુધી કરેલા આંદોલનોની ફળશ્રુતિના દાખલા જોવા મળી રહ્યા નથી. કોંગ્રેસના આક્ષેપોને ગુજરાત સરકાર સહજતાથી લઈ રહી છે અને મામા-માસીવાળું તંત્ર હાંકવામાં આવી રહ્યું હોવાની છાપ ઉપસી રહી છે. કોંગ્રેસે મગફળી કૌભાંડનો મુદ્દો ઉભો કર્યો, આંદોલન કર્યા પણ એનું પરિણામ શું આવ્યું તે બધા જાણે છે. કોઈ મોટા મગરમચ્છોને સજા થઈ નહીં અને જાડા નરોને શોધીને તેમની ફરતે કાયદાનો ગાળીયો ફીટ કરી દેવામાં આવ્યો

ત્યાર બાદ કચ્છનું સેક્સકાંડ હોય કે કોંગ્રેસના ધારાસભ્યોને ગેરલાયક ઠેરવવાના મુદ્દા હોય, ગુજરાત કોંગ્રેસ તમામ મુદ્દાઓને લોકોની વચ્ચે લઈ જવામાં સરેઆમ નિષ્ફળ રહી છે. નિવેદનીયા આંદોલનો કરવામાં આવી રહ્યા છે. નેતાઓ ટીવી અને પ્રેસનોટ આપીને પક્ષ લગતી કામગીરી કરવાનો સંતોષ માની રહ્યા છે.

ગુજરાતની મોટાભાગની મહાનગરપાલિકાઓમાં ભાજપનું રાજ છે. અનેક પ્રશ્નો છે. લોકો ત્રાહિમામ પોકારી રહ્યા છે પરંતુ ન તો ગુજરાત લેવલે અને ન તો મહાનગરપાલિકા લેવલે કોંગ્રેસનું સંગઠન લોકો વચ્ચે જઈ રહ્યું નથી. બે-પાંચ જણા રસ્તા પર આવે અને ગાંધી ચિંધ્યા માર્ગે આંદોલન કરવાની ચીમકી આપી રવાના થઈ જાય છે. સોશિયલ મીડિયા પર ભાજપ સામે બળાપો કાઢવામાં આવે પણ લોકોની સમસ્યાઓને કોંગ્રેસને જોડવાની કોશીશ કરવામાં આવી રહી નથી. નેતૃત્વ યુવાઓના હાથમાં આવી ગયું છતાં રગશીયું ગાડું હાંકવાથી કોંગ્રેસનો કોઈ ભલીવાર થવાનો નથી. આંદોલનોને અધવચ્ચે છોડી દઈ આંદોલનોની ભ્રૂણ હત્યા કરી દેવામાં આવી રહી છે.

રાહુલ ગાંધીએ રાફેલના મુદ્દાને સીધા લોકો સાથે જોડયો છે. મુદ્દો કેટલો અસરકાર નિવડ્યો છે તેનું પરિણામ ત્રણ વિધાનસભાની ચૂંટણીમાં જોવા મળ્યું છે. ગુજરાત કોંગ્રેસ મુદ્દા ઉપાડે છે પણ અધવચ્ચે જઈને છોડી દે છે. આ કોંગ્રેસની વણલખાયેલી પરંપરા જ કહેવાની રહે છે. પાયાના કાર્યકર સુધી આંદોલનના કાર્યક્રમો પહોંચી રહ્યા નથી તેની પાછળ ગુજરાત કોંગ્રેસમાં ચાલી રહેલી હું બાવો અને મંગળદાસ જેવી ટોળકીઓ જવાબદાર છે.

સમગ્ર ગુજરાતમાં પાણીનો પોકાર છે. જો ભાજપ હાલ વિરોધ પક્ષમાં હોય તો રાજ્યમાં પાણીના મુદ્દે ઠેર-ઠેર જડબેસલાક આંદોલન થઈ ગયા હોત. પરંતુ ગુજરાત કોંગ્રેસ છે કે ઊંઘમાં જાગી રહી નથી. ગુજરાત કોંગ્રેસ અને તેમાંય ખાસ કરીને દક્ષિણ ગુજરાતની કોંગ્રેસ તો છછૂંદર ગળી ગઈ હોય એમ લાગે છે. નેતાઓનો તોટો નથી. એક ગણો તો એકસો નીકળે અને દેખાવ અને પ્રદર્શનની વાત હોય તો રોકડું 50નું ટોળું જ નીકળે. કેટલીક વખત તો કોંગ્રેસના કાર્યકરો કરતાં પોલીસ વધારે હોય છે.

આ સ્થિતિમાં ગુજરાત કોંગ્રેસ મોટી મોટી ગુલબાંગો પોકારતી રહી છે ત્યારે કોંગ્રેસીઓનું કામ મીડિયાએ કરવું પડે છે. દેશમાં ગોદી અને મોદી મીડિયાની ગાળો ગુજરાત કોંગ્રેસ ગુજરાતી મીડિયાને આપી શકવાની સ્થિતિમાં નથી. કોંગ્રેસ કરતાં ગુજરાતમાં મીડિયાએ જ ગુજરાત સરકારને અનેકોનેક મુદ્દે પારોઠના પગલા ભરાવડાવ્યા છે. ગુજરાતમાં સશક્ત વિપક્ષની ભૂમિકા ભજવવામાં કોંગ્રેસ નિષ્ફળ ગઈ છે ત્યારે દિવસે સરકાર બનાવવાનાં સપના ખરેખર તો શેખચલ્લીના ખ્વાબ જેવા લાગે છે.  

ધી સુરત ડિસ્ટ્રીક્ટ મુસ્લિમ એજ્યુકેશન સોસાયટી(એંગ્લો ઉર્દુ હાઈસ્કૂલ)માં રાજીનામાની મોસમ વચ્ચે વધુ એક રાજીનામું પડ્યું છે. એંગ્લોના પૂર્વ પ્રમુખ અને હાલ મેનેજિંગ કમિટીના મેમ્બર નસીમ કાદરીએ રાજીનામું આપી દેતા વિવાદ વધુ વકર્યો હોવાનું જાણવા મળી રહ્યું છે.

અત્રે નોંધનીય છે કે દોઢ વર્ષ પહેલાં નસીમ કાદરીના નેતૃત્વમાં ખિદમત પેનલે ચૂંટણી લડી હતી. નસીમ કાદરી પહેલાં ફારુક કેપી સહિત 11 જણાએ રાજીનામા આપી દીધા હતા અને નસીમ કાદરીએ રાજીનામું આપતા કુલ 12 રાજીનામા પડી ગયા છે. પાંચમી તારીખે મળી રહેલી મેનેજિંગ કમિટીમાં નવા પ્રમુખ તરીકે ફારુક ચાંદીવાલાની વરણીની શક્યતા છે અને બાકીના 12 મેમ્બરને કો-ઓપ્ટ કરવામાં આવે તેવી માહિતી મળી રહી છે.11 રાજીનામાની જેમ નસીમ કાદરીનું પણ રાજીનામું મંજરુ કરી લેવામાં આવે તવી શક્યતા જોવા મળી રહી છે.