વડોદરા જિલ્લામાં સ્થાનિક સ્વરાજ્યની ચૂંટણીને લઈ રાજકીય વાતાવરણ ગરમાયું છે. ઉમેદવારી ફોર્મ પરત ખેંચવાની અંતિમ તારીખે જિલ્લામાં અનેક જગ્યાએ તંગદિલી, મારામારી અને તોડફોડ જેવી ઘટનાઓ સામે આવી છે.
ડભોઈ તાલુકા પંચાયતની સાઠોદ બેઠક પર કોંગ્રેસના ઉમેદવારને ફોર્મ પરત લેવા માટે દબાણ કરવામાં આવતું હોવાનો આક્ષેપ થયો હતો. આ મામલે કોંગ્રેસના કાર્યકર્તાઓ અને ધારાસભ્ય શૈલેષ મહેતા વચ્ચે ઉગ્ર બોલાચાલી થઈ અને બાદમાં મારામારી સુધી મામલો પહોંચ્યો. ઘટના દરમિયાન ભેગા થયેલા ટોળાએ ધારાસભ્ય અને તેમના પુત્ર સામે સૂત્રોચ્ચાર કર્યા અને તેમને ધક્કા માર્યા હોવાની માહિતી મળી છે. પરિસ્થિતિ બગડતા ડભોઈ પોલીસ તાત્કાલિક સ્થળ પર પહોંચી અને મામલો કાબૂમાં લીધો. હાલ પોલીસે બંને પક્ષોની રજૂઆત લઈને આગળની કાર્યવાહી હાથ ધરી છે.
બીજી તરફ, વડોદરા વોર્ડ નંબર 2માં કોંગ્રેસના ઉમેદવાર ભૂમિબેન પ્રજાપતિએ પોતાનું ઉમેદવારી ફોર્મ પરત ખેંચતા કાર્યકરોમાં ભારે રોષ ફેલાયો હતો. તેઓ ફોર્મ પરત લેવા પહોંચ્યા ત્યારે આક્રોશિત કાર્યકરોએ ફોર્મ છીનવીને ફાડી નાખ્યું હતું. એટલું જ નહીં, મામલતદાર કચેરીમાં તોડફોડ કરીને લોખંડની જાળી પણ નુકસાન પહોંચાડવામાં આવી હતી અને ભાજપ વિરોધી સૂત્રોચ્ચાર કરવામાં આવ્યા હતા. આ ઘટનામાં પોલીસે કોંગ્રેસના સ્થાનિક પ્રમુખ સહિત કેટલાક કાર્યકરોને અટકાયત કરી હોવાનું જાણવા મળ્યું છે.
આ રીતે વડોદરામાં ચૂંટણી પ્રક્રિયા દરમિયાન ઉગ્ર રાજકીય માહોલ અને કાયદો-વ્યવસ્થાને પડકારતી ઘટનાઓ સામે આવતા ચિંતાનો માહોલ સર્જાયો છે.