સુરતની આશરે પચાસ વર્ષ જૂની પ્રતિષ્ઠિત શૈક્ષણિક સંસ્થા S.Y.M.G.A. (સિમ્ગા) સ્કૂલ (અંગ્રેજી માધ્યમ) એ શિક્ષણ ક્ષેત્રે ફરી એકવાર ગૌરવપૂર્ણ સિદ્ધિ નોંધાવી છે. સંસ્થાએ સતત બીજા વર્ષે SSC અને HSC બોર્ડ પરીક્ષામાં 100 ટકા પરિણામ પ્રાપ્ત કરી અનોખો રેકોર્ડ સ્થાપિત કર્યો છે. આ સિદ્ધિ માત્ર સંસ્થાની જ નહીં, પરંતુ સમગ્ર મુસ્લિમ સમાજ માટે ગૌરવની બાબત બની છે. સાથે જ તે સમાજમાં શિક્ષણ પ્રત્યે વધી રહેલી જાગૃતિ અને પ્રગતિનું જીવંત પ્રતિબિંબ પણ છે.
સિમ્ગા સંસ્થાની અંગ્રેજી, ગુજરાતી અને ઉર્દૂ એમ ત્રણેય માધ્યમની ફૂલ ગ્રાન્ટેડ શાળાઓમાં હાલમાં આશરે 8,200 જેટલા વિદ્યાર્થી-વિદ્યાર્થીનીઓ અભ્યાસ કરી રહ્યા છે. સંસ્થામાં કાર્યરત લગભગ 375 જેટલા ટીચિંગ અને નોન-ટીચિંગ સ્ટાફ સભ્યો સંપૂર્ણ નિષ્ઠા, શિસ્ત અને સમર્પણભાવથી પોતાની ફરજ નિભાવી રહ્યા છે.
આજના સમયમાં ઘણી સંસ્થાઓ પ્રચાર, પ્રતિષ્ઠા અને આંતરિક રાજકારણમાં વ્યસ્ત જોવા મળે છે, ત્યારે સિમ્ગા સંસ્થા કોઈપણ પ્રકારના શોરબકોર વિના અનુશાસન, આયોજન અને ગુણવત્તાસભર શિક્ષણ દ્વારા સમાજસેવાનું ઉત્તમ કાર્ય કરી રહી છે, જે ખરેખર પ્રશંસનીય અને પ્રેરણાદાયી છે.
સંસ્થાના પ્રમુખ એડવોકેટ જનાબ બખ્તિયાર નાતાલવાલા, સેક્રેટરી જનાબ મઝહર નાતાલવાલા તથા ઇનચાર્જ આચાર્ય ઇમરાનભાઈના કુશળ માર્ગદર્શન હેઠળ સમગ્ર બોર્ડ ઓફ ટ્રસ્ટીઝ, શિક્ષકગણ અને સ્ટાફે વિદ્યાર્થીઓના ઉજ્જવળ ભવિષ્ય માટે અવિરત મહેનત કરી છે. આ ભવ્ય સફળતા પાછળ શિક્ષકોની તનતોડ મહેનત, વાલીઓનો વિશ્વાસ અને વિદ્યાર્થીઓની લગનનો મહત્વનો ફાળો રહ્યો છે.
ખાસ કરીને ઇનચાર્જ આચાર્ય ઇમરાનભાઈની વહીવટી કુશળતા અને દૃઢ નેતૃત્વને સૌ કોઈ બિરદાવે છે. અનેક પડકારો વચ્ચે પણ તેમણે સંસ્થાને સફળતાની નવી ઊંચાઈએ પહોંચાડી છે. તેમના માર્ગદર્શન હેઠળ ત્રણેય માધ્યમોમાં ઉત્તમ પરિણામ પ્રાપ્ત થયા છે, જેમાં ગુજરાતી અને ઉર્દૂ માધ્યમનું પરિણામ પણ અભિનંદનને પાત્ર રહ્યું છે.
સિમ્ગા સંસ્થા સતત શિક્ષણ ક્ષેત્રે નવી સિદ્ધિઓ સર કરી રહી છે અને સમાજ તેમજ કોમનું નામ ગૌરવપૂર્વક રોશન કરી રહી છે. આ અવસરે સંસ્થાના તમામ હોદ્દેદારો, ટ્રસ્ટીઓ, પ્રિન્સિપાલ, શિક્ષકગણ અને સમગ્ર સ્ટાફને હાર્દિક અભિનંદન પાઠવવામાં આવી રહ્યા છે.