મધ્યપ્રદેશની દતિયા વિધાનસભા બેઠક પર યોજાયેલી પેટાચૂંટણીમાં કોંગ્રેસે મોટો રાજકીય ઉલટફેર સર્જ્યો છે. ભાજપનો પરંપરાગત ગઢ ગણાતી આ બેઠક પર મતગણતરી દરમિયાન શરૂઆતમાં ભાજપ આગળ રહ્યું હતું, પરંતુ બાદના રાઉન્ડમાં કોંગ્રેસે જોરદાર વાપસી કરીને નિર્ણાયક લીડ મેળવી લીધી છે.
૩૦ જુલાઈએ યોજાયેલી પેટાચૂંટણીમાં મતદારોનો સારો ઉત્સાહ જોવા મળ્યો હતો અને કુલ 71.44 ટકા મતદાન નોંધાયું હતું.
મતગણતરીના પ્રથમ રાઉન્ડમાં ભાજપના ઉમેદવારને 4,551 મત મળ્યા હતા, જ્યારે કોંગ્રેસના ઉમેદવાર ઘનશ્યામ સિંહને 3,367 મત મળતાં ભાજપે શરૂઆતની સરસાઈ મેળવી હતી. જોકે ચોથા રાઉન્ડ સુધી પહોંચતા ચૂંટણીનું ચિત્ર સંપૂર્ણ બદલાઈ ગયું અને કોંગ્રેસના ઉમેદવારે 833 મતની લીડ મેળવી હતી.
છઠ્ઠા રાઉન્ડની મતગણતરી પૂર્ણ થતાં કોંગ્રેસે પોતાની લીડ વધારીને 1,786 મત કરી હતી. ત્યારબાદ દરેક રાઉન્ડ સાથે કોંગ્રેસની સરસાઈ સતત વધી હતી. 12મા રાઉન્ડના અંતે કોંગ્રેસના ઉમેદવાર ઘનશ્યામ સિંહને 58,417 મત મળ્યા હતા અને તેઓ ભાજપના ઉમેદવાર સામે 12,607 મતની મજબૂત લીડ સાથે આગળ ચાલી રહ્યા હતા.
દતિયા બેઠક પર આ પરિણામને મોટા રાજકીય ઉલટફેર તરીકે જોવામાં આવી રહ્યું છે. ભાજપનો વર્ષોથી ગઢ રહેલી આ બેઠક પર પક્ષે આ વખતે પોતાના પૂર્વ ગૃહમંત્રીને ટિકિટ આપવાના બદલે નવા ઉમેદવાર પર દાવ રમ્યો હતો. જોકે ઉમેદવાર બદલવાનો નિર્ણય પક્ષને ભારે પડતો જોવા મળી રહ્યો છે અને કોંગ્રેસે તેનો રાજકીય લાભ ઉઠાવી ભાજપના ગઢમાં જ મજબૂત પડકાર ઉભો કર્યો છે.
હવે અંતિમ પરિણામ પર સૌની નજર છે, પરંતુ અત્યાર સુધીના વલણો કોંગ્રેસ માટે ઐતિહાસિક જીત તરફ ઈશારો કરી રહ્યા છે, જ્યારે ભાજપ માટે આ બેઠક પર આત્મમંથનનો વિષય બની શકે છે.