પેગાસસ જાસૂસી કેસ અંગે સુપ્રીમ કોર્ટ સખત, કેન્દ્રએ સોગંદનામું દાખલ કરવાનો કર્યો ઇન્કાર કર્યો, કહ્યું, “આ જાહેર ચર્ચાનો વિષય નથી”

દેશના ચર્ચાસ્પદ પેગાસસ જાસૂસી કેસ અંગે સોમવારે સુપ્રીમ કોર્ટમાં સુનાવણી હાથ ધરવામાં આવી હતી. સુનાવણી દરમિયાન કેન્દ્ર સરકારે સ્પષ્ટપણે કહ્યું કે તે આ મામલે સોગંદનામું દાખલ કરવા જઈ રહી નથી. સરકાર કહે છે કે આ પબ્લિક ડોમેનની બાબત નથી, તેથી સોગંદનામું દાખલ કરી શકતી નથી. કેન્દ્રએ કહ્યું કે તેની પાસે છુપાવવા માટે કંઈ નથી અને આ કારણોસર તેણે તેના વતી નિષ્ણાતોની સમિતિની રચના કરવાનું કહ્યું છે.

કેન્દ્રએ મુખ્ય ન્યાયાધીશ એનવી રમન્નાની અધ્યક્ષતાવાળી ખંડપીઠને કહ્યું કે તેની પાસે છુપાવવા માટે કંઈ નથી અને તેથી સરકારે પોતે કહ્યું છે કે તે આરોપોની તપાસ માટે નિષ્ણાતોની સમિતિની રચના કરશે.

સુનાવણી દરમિયાન સુપ્રીમ કોર્ટે પણ કેન્દ્ર સામે કડકતા દર્શાવી છે. મુખ્ય ન્યાયાધીશ એનવી રમન્નાએ સીધું જ કહ્યું છે કે કોર્ટ જાણવા માંગે છે કે સરકાર આ મામલે શું કરી રહી છે.

સોલિસિટર જનરલ તુષાર મહેતાએ બેન્ચને કહ્યું કે સરકાર દ્વારા કોઈ ખાસ સોફ્ટવેરનો ઉપયોગ કરવામાં આવે છે તે જાહેર ચર્ચાનો વિષય નથી અને આ માહિતીને સોગંદનામાનો એક ભાગ બનાવવો રાષ્ટ્રીય હિતમાં નથી. મહેતાએ કહ્યું કે ડોમેન નિષ્ણાતોની સમિતિનો રિપોર્ટ સુપ્રીમ કોર્ટ સમક્ષ મૂકવામાં આવશે.

સર્વોચ્ચ અદાલતે મહેતાને કહ્યું કે તે પહેલેથી જ સ્પષ્ટ કરી ચૂકી છે કે તે નથી ઇચ્છતી કે સરકાર રાષ્ટ્રીય સુરક્ષા સાથે ચેડાં કરે તેવી કોઈ બાબત જાહેર કરે. સુનાવણી બાદ આ મામલે ચુકાદો અનામત રાખવામાં આવ્યો છે.