દુનિયાના ભલભલા દેશોને ધોળા દિવસે આભના તારા દેખાડી દેનારી મહાશક્તિ અમેરિકા આજે કોરોના વાઈરસ સામે ઘૂંટણીયે પડી ગયું છે. અહીં કોરોનાના કારણે થઈ રહેલા મોત કેમેય કરીને રોકાતા નથી. અમેરિકામાં છેલ્લા 24 જ કલાકમાં અત્યાર સુધીમાં સૌથી વધારે બે હજાર લોકોના મોત થતા દુનિયા આખી હચમચી ઊઠી છે.
જોન્સ હોપકિંસ યુનિવર્સિટીના જણાવ્યા પ્રમાણે અમેરિકામાં છેલ્લા 24 જ કલાકમાં 1939 લોકોના મોત નિપજ્યા છે. આ સાથે જ અમેરિકામાં કોરોના વાઈરસના કારણે મરનારાઓની સંખ્યા 12,722 પહોંચી ગઈ છે. દુનિયામાં કોરોનાથી મરનારા લોકોની સંખ્યામાં અમેરિકા ત્રીજા નંબર પર આવી ગયું છે. કોરોનાના કારણે અત્યાર સુધીમાં 17,127 સાથે ઈટાલી પહેલા અને 13,798 લોકોના મોત સાથે સ્પેન બીજા ક્રમે આવી ગયું છે.
અમેરિકામાં કોરોનાનો વ્યાપ ખૂબ જ ઝડપથી વધી રહ્યો છે. કોરોના વાઈરસના કારણે અમેરિકામાં છેલ્લા 24 કલાકમાં 1900થી વધુ લોકોના મોત થયા છે. અમેરિકામાં કોરોનાના નવા 33 હજારથી વધુ કેસ નોંધાતા કુલ પોઝિટિવ કેસ ચાર લાખને પાર થયા છે. યુએસમાં કોરોનાથી કુલ મૃત્યુઆંક 12, 722 થયો છે. અમેરિકાનું ન્યૂયોર્ક એ કોરોનાનું એપી સેન્ટર બની ગયું છે ત્યારે ન્યૂયોર્ક સિટીમાં વર્લ્ડ ટ્રેડ સેન્ટર પર થયેલા હુમલાથી વધુ લોકોના મોત કોરોનાથી થયા છે.
અમેરિકામાં નોંધાયેલા કુલ ચાર લાખ પોઝિટિવ કેસમાંથી ન્યૂયોર્કમાં જ એક લાખ ૪ર હજારથી વધુ પોઝિટિવ કેસ છે. ન્યૂયોર્કમાં મૃત્યુઆંક પાંચ હજાર ચારસોને પાર પહોંચ્યો છે. શબ દફનાવવા માટે કબ્રસ્તાનમાં જગ્યા રહી નથી. ન્યૂયોર્ક શહેરની મુખ્ય મેડિકલ પરીક્ષણ ઓફિસની બહાર એક અસ્થાયી કબ્રસ્તાન બનાવ્યું છે. અધિકારી શબોને જાહેર સ્થળોએ અસ્થાયી રીતે દફનાવવાની યોજના પર કામ કરી રહ્યા છે, જ્યારે પરિસ્થિતિ થાળે પડશે તો યોગ્ય સ્થળે દફનાવાશે.
કોરોના વાયરસને કારણે યુરોપ અને અમેરિકા સહિત વિશ્વભરમાં 75 હજારથી વધુ લોકોના મોત નિપજ્યા છે. કોવિડ-19 ને કારણે અડધુ વિશ્વ કોઈને કોઈ પ્રકારે લોકડાઉનનો સામનો કરી રહ્યું છે. આ ઘાતક વાઈરસે વિશ્વવ્યાપી અર્થવ્યવસ્થાને ભારે અસર કરી છે.
રાજ્યના રાજ્યપાલ એન્ડચ્યુ કુઓમોએ કહ્યું છે કે આ બેદરકારીનો સમય નથી. મેયર બિલ ડી બ્લેસિઓએ કહ્યું છે કે ન્યૂયોર્ક સિટી તેની સામે લડી રહ્યું છે. આપણો દુશ્મન અદૃશ્ય છે. અમારો દુશ્મન ક્રૂર છે, પરંતુ આ શહેર લડી રહ્યું છે. ન્યૂયોર્કમાં લાશોને દફનાવવા માટેની જગ્યા ખૂટી પડી છે.