વરાછામાં સાંજે નો પાર્કિંગમાં પાર્ક વાહનોને ટો કરીને જતી ક્રેનનો એક બાઇક સવારે મિત્ર સાથે પીછો કર્યો હતો. ક્રેન પર પથ્થર માર્યો તથા પાઇપથી ક્રેનના કર્મી પર હુમલો કર્યો હતો. ક્રેન કર્મીએ બાઈક સવાર વિરુદ્ધ હત્યાની કોશિશ અને સરકારી ફરજમાં રૂકાવટનો ગુનો નોંધાવ્યો છે.
વરાછા પોલીસના જણાવ્યા અનુસાર, ટ્રાફિક બ્રાંચની વાહનો ટો કરતી ક્રેન પર નરેશ કાજુ રાજપુત કામ કરે છે. સોમવારે ચારેક વાગે નરેશ વરાછામા ક્રેન નંબર બે પર નોકરી પર હતો. ક્રેન પર હેડ કોન્સ્ટેબલ પિયુષ ગમાર ઇન્ચાર્જ હતા. ઉમીયાધામથી ફુલ માર્કેટ જતા રસ્તા પરથી નરેશ અને બીજા ક્રેન કર્મીઓએ ચાર બાઈક ટો કરી હતી. તેઓ વાહનો લઈને ગીતાંજલી સિનેમા પાસે જઈ રહ્યા હતા. ત્યારે રસ્તામાં એક યુવક અને તેના મિત્રએ ક્રેનનો પીછો કર્યો હતો. તેઓએ કહ્યું કે તેમની બાઈક છે. તેઓએ ક્રેન પર પથ્થર માર્યો હતો. જોકે કોઈને પથ્થર વાગ્યો ન હતો. પછી બાઈકવાળા યુવકે પાઈપથી નરેશ પર હુમલો કર્યો હતો. તેમજ ક્રેન કર્મીનો પગ પકડી લેતા નરેશ નીચે પટકાયો હતો. તેથી તેને ગંભીર ઇજા થઈ હતી. નરેશને સારવાર માટે સ્મીમેર હોસ્પિટલ દાખલ કર્યો છે. નરેશે બાઈક સવાર અને તેના મિત્ર વિરુદ્ધ હત્યાની કોશિશ અને સરકારી ફરજમાં રૂકાવટનો ગુનો દાખલ કર્યો છે.