આસામ સરકારે તાજેતરમાં એક નિયમ નિર્ધારિત કર્યો છે, જે અંતર્ગત બે કરતા વધારે બાળકો ધરાવતા દંપતીને સરકારી નોકરીમાં રાખવામાં આવશે નહીં. સરકારના આ નિર્ણયને લઈને રાજકારણ શરૂ થઈ ગયું છે. એઆઈયુડીએફ પ્રમુખ અને લોકસભાના સાંસદ બદરૂદ્દીન અજમલે કહ્યું કે મુસ્લિમોએ આ નિયમની ચિંતા ન કરવી જોઈએ, કારણ કે તેમને કોઈ સરકારી નોકરી મળવાની નથી.
મૌલાના અજમલે કહ્યું, ‘આપણે જાણીએ છીએ કે ભાજપ સરકારના કાર્યકાળ દરમિયાન મુસ્લિમોની ભારે અવગણના કરવામાં આવે છે. વર્તમાન સરકારમાં મુસ્લિમોને સરકારી નોકરી મળવાની તકો સહેજ પણ નથી, તેથી બે બાળકોની નીતિને અનુસરવાની જરૂર શું છે? તેમણે કહ્યું, ‘આપણા ધર્મમાં આવો કોઈ નિયમ નથી. હું મુસ્લિમ યુવાનોને પોતાનો ધંધો શરૂ કરવા અપીલ કરીશ, જેથી ઘણા લોકોને રોજગાર મળે. ‘
તમને જણાવી દઈએ કે આસામના મુખ્યમંત્રી સર્વાનંદ સોનોવાલના નેતૃત્વમાં રાજ્યની ભાજપ સરકારે તાજેતરમાં નિર્ણય લીધો છે કે જાન્યુઆરી 2021થી સરકારી નોકરી માટે નક્કી કરેલા નિયમોમાં પણ બે બાળકોની નીતિનો અમલ કરવામાં આવશે. આ અંતર્ગત બે થી વધુ બાળકો ધરાવતા પુરુષ અથવા સ્ત્રીને સરકારી નોકરી માટે યોગ્ય ગણવામાં આવશે નહીં. સરકારના આ નિર્ણય પર મૌલાના અજમલે આવા પ્રકારની પ્રતિક્રિયા આપી હતી.
ભાજપના પ્રવક્તા સૈયદ મોમીનુલ ઔવલે ભાજપ સરકારમાં મુસ્લિમોના રોજગાર નહીં મળવાના દાવા પર નિશાન સાધતા કહ્યું હતું કે, ભાજપ સરકાર દરમિયાન ઘણા મુસ્લિમ યુવાનોને નોકરી મળી હતી. તેમણે કહ્યું, ‘જ્યારે અમારી સરકારે બે બાળકોની નીતિ ઘડી હતી, તે સમયે કોઈ ધર્મને ધ્યાનમાં લેવામાં આવ્યો ન હતો. વસ્તી વિસ્ફોટને ધ્યાનમાં રાખીને આ નિર્ણય લેવામાં આવ્યો છે. પરંતુ મૌલાના અજમલે જે રીતે તેને ધર્મ સાથે જોડ્યો છે તે દુર્ભાગ્યપૂર્ણ છે.’ ભાજપે કહ્યું કે મૌલાના અજમલની પત્નીને પૂછવામાં આવે કે શું તેઓ સાતથી આઠ બાળકોને જન્મ આપવા માટે તૈયાર છે. ભાજપ દ્વારા મૌલાના અજમલની પ્રતિક્રિયા પર ભાજપે વળતો જવાબ આપ્યો છે.