મુખ્યમંત્રી વિજય રૂપાણીએ મહેસાણાના કડીમાં જહોન્સન-હિટાચી એર કન્ડીશનીંગના ભારતમાં સૌપ્રથમ ગ્લોબલ ડેવલપમેન્ટ સેન્ટરનો પ્રારંભ કર્યું હતું. 157 કરોડ રૂપિયાના રોકાણથી આ સેન્ટર શરૂ કરવામાં આવ્યું છે.
તેમણે જણાવ્યું કે, પ્રધાનમંત્રી મોદીએ ગુજરાતના તેમના મુખ્યમંત્રી કાળ દરમ્યાના વિશ્વમાં જે કાંઇ શ્રેષ્ઠ છે તે બધું ગુજરાતની ધરતી ઉપર ઉતારવાની અને ગુજરાતને દેશના વિકાસનું રોલ મોડેલ બનાવવાની સંકલ્પબદ્ધતા આ સરકારે પણ સાકાર કરી છે.
મુખ્યમંત્રી રૂપાણી કહ્યું કે, યુવાશકિતના નવા વિચારો-કૌશલ્યજ્ઞાનને વેગ આપવા સ્ટાર્ટઅપ તેમજ નવા સંશોધનો, ડિઝાઇનીંગ ગ્લોબલ સ્ટાન્ડર્ડ અનુરૂપ કરવા માટેની વિશાળ તકો ગુજરાતમાં ઉપલબ્ધ બનાવી છે.
તેમણે કહ્યું કે વર્લ્ડકલાસ ગુણવત્તા અને પ્રતિષ્ઠા ધરાવતી હિટાચીનું આ ગ્લોબલ ડેવલપમેન્ટ સેન્ટર આવનારા દિવસોમાં ગુજરાતના યુવાનોને જોબ ગીવર બનાવશે અને ઇજનેરી-તકનીકી કૌશલ્યવર્ધનને નવી દિશા આપશે તેવો વિશ્વાસ તેમણે દર્શાવ્યો હતો.
મુખ્યમંત્રી રૂપાણીએ રાજ્યમાં ઇઝ ઓફ ડૂઇંગ બિઝનેસ, ફોરેન ડાયરેકટ ઇન્વેસ્ટમેન્ટ અને લોજિસ્ટીકસ ઇન્ફ્રાસ્ટ્રકચર ઉપરાંત 1600 કિ.મી. સમુદ્ર કિનારાની જાહોજલાલી લોથલ-ખંભાતના બંદરોની સદીઓ જૂની જાહોજલાલી જેવી થાય તે માટે પોર્ટ પોલિસી, MSME એકમોને સોલાર એનર્જી ઉત્પાદન માટે વિશેષ રાહતો સહિતના ઔદ્યોગિક મૈત્રીપૂર્ણ અભિગમની વિશદ ભૂમિકા આપી હતી.
નાયબ મુખ્યમંત્રી નિતીન પટેલે જણાવ્યું હતું કે કડી ખાતે હિટાચી કંપનીના ગ્લોબલ સેન્ટરના પ્રારંભથી રાજ્યને ગૌરવ મળ્યું છે. જાપાનની વિવિધ કંપનીઓના ઉત્પાદન એકમો મહેસાણા જિલ્લામાં કાર્યરત છે. રાજ્યમાં મોટાપાયે વિવિધ રોકાણો આવી રહ્યા છે જે માટે રાજ્ય સરકારે નવીન પ્રોત્સાહક પગલાં લીઘાં છે.
નાયબ મુખ્યમંત્રીએ ઉમેર્યું હતું કે લઘુ અને મધ્યમ ઉધોગોને ત્રણ વર્ષ સુધી જરૂરી મંજુરી વગર ઉત્પાદન કરવાની છૂટ આપનારૂં ગુજરાત દેશનું પ્રથમ રાજ્ય બન્યું છે. આ ઉપરાંત ઔધોગિક એકમોમાં એપ્રેન્ટીસોને પ્રોત્સાહન આપવાની પણ શરૂઆત કરી છે અને સ્થાનિક યુવાઓનું કૌશલ્યવર્ધન કર્યુ છે.
કંપનીના મેનેજીંગ ડિરેક્ટર ગુરમીતસિંઘે જણાવ્યું હતું કે રાજ્ય સરકાર સાથે 2009ની વાયબ્રન્ટ સમીટમાં એમ.ઓ.યુ સાઇન કર્યા બાદ આજે આ કંપની દેશની સૌથી વિશાળ એરકંડિશનર ઉત્પાદિત સુવિધાઓમાંથી એક બની છે. આ સેન્ટરના પ્રારંભથી એન્જિનીયરીંગ અને ઇનોવેશન હબ સાથે રીસર્ચ, પ્રોડક્ટ ડેવલમેન્ટ અને સ્કીલ એન્હેસમેન્ટમાં ગુજરાત વિશ્વના નકશા પર મુકાશે.
150 થી વધુ એન્જિનીયર્સ અને 300ની ક્ષમતા સાથે નવું સેન્ટર વિવિધ સુવિધાઓથી સજ્જ થયું છે. 21042 સ્કેવર મીટરની વિશાળ જગ્યા સાથે શરૂ થયેલું ગ્લોબલ ડેવલપમેન્ટ સેન્ટર વિશ્વનું ચોથુ અને દેશનું પ્રથમ સેન્ટર છે. હિટાચી દ્વારા જાપાનમાં બે અને ચીનમાં એક સેન્ટર હાલમાં કાર્યરત છે.