વિકાસ ખોવાયો છે: આઝાદીના 70 વર્ષે પણ ભરૂચના આ 10 ગામો રાહ જૂએ છે કે “મારા ગામમાં ક્યારે બસ આવશે?”

ગુજરાત સરકાર ધ્વારા ભરૂચ જિલ્લાના વાલીયા અને ઝઘડીયા તાલુકામાંથી 76 ગામો અલગ પાડી નવો નેત્રંગ તાલુકો બનાવવામાં આવ્યો હતો. જેમાં નવો નેત્રંગ તાલુકો બનાવવા પાછળનો ગુજરાત સરકારનો મુખ્ય હેતુ હતો કે રાજયના સરકારની વિવિધ કલ્યાણકારી યોજનાનો લાભ છેવાડાના ગામો સુધી પહોંચે અને સમગ્ર વિસ્તારનો સર્વાંગી વિકાસ થાય.પરંતુ કમનસીબે નેતાઓ અને રાજ્ય સરકારના વાયદાઓ પોકળ સાબિત થઇ રહ્યા હોય તેવું જણાઇ રહ્યું છે,જેમાં દેશની આઝાદીના 70 વર્ષ પસાર થવા છતાં આજદિન સુધી નેત્રંગ તાલુકાના પછાત ગામોમાં એસ.ટી બસ આવી નથી,તેવી ચોકાવનારી ઘટના પ્રકાશમાં આવી છ. જેમાં નેત્રંગ ટાઉનથી ઉત્તર દિશામાં 10 કિ.મીટર બાદ આવેલા ધોલેગામ, ઢેબાર, કાકરાપાડા, મુંગજ, મચામડી, વાંકોલ, ઉમરખેડા, વણખુંટા અને કોયલાપાડા ગામો આવેલ છે,અને જે 100 ટકા આદિવાસી સમાજના લોકો વસવાટ કરે છે.

મુખ્યત્વે આ પછાત વિસ્તારના ગામના સ્થાનિક રહીશોને જીવના જોખમે ખાનગી વાહનોમાં મુસાફરી કરીને નેત્રંગ અને ઝધડીયા તરફ આવવું-જવવું પડે છે. એસ.ટી બસની સુવિધાના અભાવે ગામની મહિલાઓ,વયોવૃદ્ર દંપતીને નેત્રંગ દવાખાણામાં આરોગ્યની તપાસણી અને યુવાનોને રોજીરોટી કમાવવા અંકલેશ્વર અને ઝઘડીયા ઔદ્યોગિક એકમોમાં જવા સહિત પછાત વિસ્તારમાં વસવાટ કરતાં ગરીબ પરિવારના લોકોને જીવનજરૂરીયાતની ચીજવસ્તુ ખરીદી કરવા માટે પણ ભારે હાડમારીનો સામનો કરવો પડી રહ્યો છે,જ્યારે ઉચ્ચ શિક્ષણ માટે ગરીબ પરિવારના વિદ્યાર્થી વાલીયા,અંકલેશ્વર,ભરૂચ,વાંકલ અને માંડવી જતાં હોય છે,પરંતુ પોતાના ગામમાં એસ.ટી બસ આવતી નહીં હોવાથી ખાનગી વાહનોમાં મુસાફરી કરીને નેત્રંગ આવવું પડે છે,ત્યારબાદ એસ.ટી બસમાં બેસીને અભ્યાસ માટે મુસાફરી કરવી પડે છે,જેથી વિદ્યાર્થીઓને ભારે હાડમારી વેઠવી પડતી હોય છે,જેથી વિદ્યાર્થીઓનું ભવિષ્ય પણ અંધકાર તરફ ધકેલવાની શક્યતાઓ જણાઇ રહી છે.

જ્યારે બીજી બાજુએ નેત્રંગ તાલુકાના અંતરીયાળ વિસ્તારના                ધોલેગામ,ઢેબાર,કાકરાપાડા,મુંગજ,મચામડી,વાંકલ,ઉમરખેડા,ખુટાપાડા,પાડા અને કોયલાપાડા ગામના રસ્તાના કોઇ ઠેકાણા નથી,જેમાં છેલ્લા 15 વર્ષથી રસ્તાનું પ્રાથમિક ધોરણે પણ સમારકામ કરાયું નથી તેવું જાણવા મળ્યુ છે,જેના કારણે રાજ્ય સરકારની આરોગ્યલક્ષી 108 એમ્બલન્સ સમય પર દદીઁ સુધી પોહચીં શકતી નથી,જેથી સ્થાનિક રહીશોની હાલત બદ્રતર થઇ જવા પામી છે,જ્યારે નેત્રંગના અંતરીયાળ વિસ્તારધા ગામોમાં વસવાટ કરતા 5 થી 6 હજાર જેટલા સ્થાનિક રહીશોને વિકાસ વિકાસ એટલે શું એ ખબર જ નથી.તેવું જણાઇ રહ્યુ છે.