2017માં અલ્પેશ ઠાકોરે કોગ્રેસમાં રાહુલ ગાંધીના નેતૃત્વમાં દબદબાભેર એન્ટ્રી કરી હતી. ગાંધીનગરમાં વિશાલ સંમેલન યોજ્યું હતું અને ભાજપ ડરી ગયું હતું. જ્યારે આજે અલ્પેશ ઠાકોરે ભાજપની પ્રદેશ નેતાગીરીથી સાથે તડજોડ કરી છે. કોંગ્રેસમાં રાહુલ ગાંધી સાથે સીધી વાત થતી હતી પણ ભાજપમાં અલ્પેશ ઠાકોરે પ્રદેશ નેતાગીરી પર નિર્ભર રહેવું પડશે. ભાજપમાં પ્રવેશ કરતી વેળા પ્રદેશ પ્રમુખ જીતુ વાઘાણી હતા અને જીતુ વાઘાણીની જ ભરચક કોશીશો હતી કે અલ્પેશ ઠાકોરને ભાજપમાં પ્રવેશ મળે. કોંગ્રેસમાં રાષ્ટ્રીય પ્રમુખ હતા અને ભાજપમા પ્રદેશ પ્રમુખ હતા. બન્ને પાર્ટીઓની એન્ટ્રી વચ્ચે આટલો મોટો ફરક છે.
કોંગ્રેસમાં અલ્પેશ ઠાકોરનું રાષ્ટ્રીય કદ વધ્યું હતું, જ્યારે ભાજપ અલ્પેશ ઠાકોરને શું આપે છે તે જોવાનું રહે છે. કોંગ્રેસમાં આવતાં જ અલ્પેશ ઠાકોરને સાત હોદ્દા પ્લસ ધારાસભાની ટીકીટ અને તેમના કહેવાથી અન્ય લોકોને પણ ટીકીટ આપવામાં આવી હતી.
એક તરફ અલ્પેશ ઠાકોર રાષ્ટ્રીય રાજકારણમાં ડગ માંડી રહ્યા હતા ત્યાં તો તેમણે જાતે બ્રેક મારી દીધી. યૂ-ટર્ન લેવાનો કોઈ સ્કોપ રાખ્યો નહીં અને ધડાધડ નિર્ણયો લેવા માંડ્યા અને તેના પરિણામો સામે છે. ભાજપ કદાચ ફરી વાર રાધનપુરથી ટીકીટ આપશે તો પણ કોંગ્રેસ સમોવડું રાજકીય વજન અને કદ તો ભાજપમાં મળવાનું નથી.
કોંગ્રેસમાં અલ્પેશ ઠાકોરને લાંબી રેસનો ઘોડો માનવામાં આવતો હતો અને તે પ્રમાણે પાર્ટીમાં પ્રોજેક્શન પણ મળ્યું હતું. ખાસ કરીને યુવા નેતા તરીકે અલ્પેશ ઠાકોર માટે કોંગ્રેસની ચોક્કસ રણનીતિ હતી પણ કોંગ્રેસ જેવી પાર્ટી અલ્પેશ ઠાકોરને સાચવી શકી નહીં એ પણ હકીકત છે.