ભારતની સ્ટાર ખેલાડી અને 100 મીટર દોડમાં નેશનલ રેકોર્ડ હોલ્ડર દુતી ચંદે પોતાના જીવન સાથીને લઈ ખુલાસો કર્યો છે. એશિયન ગેમ્સમાં સિલ્વર મેડલ જીતનારી આ ખેલાડીએ કહ્યું કે તે પોતાના શહેરની એક મહિલા મિત્ર સાથે રિલેશનશીપમાં છે. દૂતી ઓરિસ્સાસના ચાકા ગોપાલપુર ગામની વતની છે અને જાજપુર જિલ્લામાં તેના માતા-પિતા વણકરનું કામ કરે છે. ભારતની સ્ટાર સ્પ્રિંટર 100 મીટર, 200 મીટર અને 4×100 મીટર દોડમાં ભાગ લે છે.
દુતીએ અંગ્રેજી અખબારને આપેલા ઈન્ટરવ્યુમાં કહ્યું કે મેં મારા જીવન સાથીને શોધી લીધી છે. મને લાગે છે દરેકને સ્વતંત્રતા હોવી જોઈએ કે તે કોની સાથે રહેવા માંગે છે અને તે સહેલાઈથી પોતાનો પાર્ટનર પસંદ કરી શકે.
23 વર્ષીય દુતીએ કહ્યું કે હું હંમેશાથી એવા લોકોને સપોર્ટ કરું છું જે સમલૈંગિક(લેસ્બિયન) છે. આ દરેકની પોતાની વ્યક્તિગત પસંદનો સવાલ છે. હાલમાં તો મારું સંપૂર્ણ ધ્યાન વર્લ્ડ ચેમ્પિયનશીપ અને ઓલિમ્પિક ગેમ્સ પર છે. પરંતુ હું ભવિષ્યમાં હું મારા સાથી સાથે જ સેટલ થવાનો વિચાર કરું છું.
આ ખેલાડીએ કહ્યું કે આઈપીસીની કલમ 377ને સુપ્રીમ કોર્ટ પાછલા વર્ષે ગુનો નહીં હોવાનું જણાવી હુકમ કર્યો હતો. ત્યાર બાદથી દુતી પોતાના સંબંધો વિશે જાહેરમાં બોલવા લાગી હતી. દુતી કહે છે કે એક એથ્લેટ તરીકે મારે શું કરવું જોઈએ તે હું જાણું છું મને લઈને કોઈને પણ ગમે તેવો અભિપ્રાય બાંધવાની જરૂર નથી. આ મારો પોતાના વ્યક્તિગત નિર્ણય છે જેનું સન્માન થવું જોઈએ.