સ્પર્મ એકત્ર કર્યા બાદ વડોદરામાં કોરોના દર્દીનું મોત, પત્નીએ કરી હતી બાળકને જન્મ આપવાની ઈચ્છા

ગુજરાત હાઈકોર્ટના નિર્દેશો પર વડોદરાની એક ખાનગી હોસ્પિટલ દ્વારા ગંભીર કોવિડ-19 દર્દીના સ્પર્મને એકત્રીત થયાના કલાકો પછી દર્દીનું મોત નીપજ્યું હતું. દર્દીની પત્નીએ બાળકને જન્મ આપવાની ઇચ્છા વ્યક્ત કરતાં, પતિના વીર્યને એકત્રિત કરવા માટે હાઇકોર્ટની મંજૂરી માંગી હતી. કોવિડ -19 દર્દી બાઈલેટરલ ન્યુમોનિયાથી પીડિત હતો.

આ ઘટના પ્રકાશમાં આવ્યા બાદ પત્ની અને સગાઓમાં શોકનું વાતાવરણ જોવા મળી રહ્યું છે. હોસ્પિટલ ખાતે સંબંધીઓનું માતમ જોવા મળ્યું હતું. દર્દીને બચાવવા માટે ડોક્ટરો દ્વારા ભરચક પ્રયાસ કરવામાં આવ્યા હતા પરંતુ આખરે મોત સામેનો જંગ દર્દી હારી ગયો હતો.

 

 

શાબ્બાશ: ગુજરાતના આ જિલ્લાનાંં પાંચ ગામોમાં 100 ટકા રસીકરણ

ભરૂચ જિલ્લામાં આરોગ્ય વિભાગ દ્વારા કરવામાં આવી આવી રહેલી કોવિડ-૧૯ કોરોના વાઇરસની રસીકરણની કામગીરીમાં સિમાચિહ્નરૂપ ૫(પાંચ) ગામોમાં સો ટકા રસીકરણ કરવામાં આવ્યું હોવાનું આરોગ્ય વિભાગ તરફથી જણાવાયું છે.

ભરૂચ જિલ્લા કલેક્ટર ડૉ. એમ.ડી.મોડિયાના સીધા માર્ગદર્શન હેઠળ અને જિલ્લા વિકાસ અધિકારી યોગેશ ચૌધરી રાહબરી હેઠળ જિલ્લા પંચાયત આરોગ્ય વિભાગ દ્વારા જિલ્લામાં કોવિડ-૧૯ કોરોના વાઇરસ સામે પ્રતિરોધાત્મક રસી માટેના રસીકરણની કામગીરી કરવામાં આવી રહી છે. આરોગ્ય વિભાગ દ્વારા જિલ્લાના વિવિધ તાલુકાના ૫(પાંચ) ગામોમાં સો ટકા રસીકરણની કામગીરી કરી સીમાચિહ્ન સ્થાપિત કરવામાં આવ્યું છે.

જિલ્લા આરોગ્ય વિભાગ તરફથી મળતી વિગતો અનુસાર જિલ્લામાં કરવામાં આવી રહેલી રસીકરણની કામગીરી દરમિયાન હાંસોટ તાલુકાના સાહોલ, વાગરા તાલુકાના નાંદરખા, આમોદ તાલુકાનું મંજોલા, અંકલેશ્વર તાલુકાના સજોદ અને કાનવા ગામે સો ટકા રસીકરણનો લક્ષ્યાંક સિદ્ધ કરવામાં આવ્યો છે.

જિલ્લામાં રસીકરણ અંગે જાગૃતિ આવે તથા જિલ્લાની જાહેર જનતા રસીકરણ કરાવવા માટે આગળ આવે એ માટે જિલ્લા પ્રશાસન દ્વારા અનેક પ્રયાસો કરવામાં આવી રહ્યા છે. જેના ફળસ્વરૂપે જિલ્લાના ઉપરોકત પાંચ ગામોએ સો ટકા રસીકરણની સિદ્ધિ હાંસલ કરી છે.

અત્રે ઉલ્લેખનીય છે કે, સમગ્ર વિશ્વને ભરડામાં લેનાર કોવિડ-૧૯ કોરોના વાયરસની મહામારીને નાથવા માટે રસીકરણ જ એકમાત્ર વિકલ્પ છે. નિષ્ણાંતો દ્વારા નજીકના સમયમાં કોરોના વાયરસના સંક્રમણની ત્રીજી લહેરની સંભાવના વ્યક્ત કરવામાં આવી રહી છે ત્યારે ભરૂચ જિલ્લા પ્રશાસન દ્વારા જાહેર જનતાને કોરોના વાયરસના સંક્રમણથી બચાવવા માટે રસીકરણ કરવામાં આવી રહ્યું છે. આવનારી સંભવિત ત્રીજી લહેરથી બચવા માટે જિલ્લાના તમામ પ્રજાજનોને ઝડપથી રસીકરણ કરાવી લેવા જિલ્લા પ્રશાસન તરફથી જિલ્લા કલેકટર ડૉ. એમ.ડી.મોડિયા દ્વારા અનુરોધ કરવામાં આવ્યો છે.

પોર્ન ફિલ્મ રેકેટ: સુરતના તન્વીર હાશમીએ અનેક પોર્ન ફિલ્મ બનાવી રાજ કુંદ્રાને વેચી હતી

હાલ સમગ્ર દેશમાં ટોક ઓફ ધી ટાઉન બનેલી રાજકુંદ્રા દ્વારા પોર્ન ફિલ્મોના રેકેટની ઘટનામાં સૌથી પહેલા મુંબઈ ક્રાઈમ બ્રાંચ સુરતના તન્વીર હાશ્મીને ઉંચકી ગઈ હતી. સુરત જિલ્લાના બારડોલી ખાતેના બંગલામાં પોર્ન ફિલ્મોનું શૂટીંગ કરવામાં આવ્યું હોવાનું પણ પોલીસ તપાસમાં જે-તે વખતે ખૂલવા પામ્યું હતું.

તન્વીરે ઘણી પોર્ન ફલ્મો બનાવી રાજકુંદ્રાને વેચી હોવાની શક્યતાઓ છે. આ ફિલ્મોના બદલે રાજકુંદ્રા તન્વીરને મસમોટી રકમ આપતો હોવાની વાત છે. સુરતમાં તન્વીરની ધરપકડ પછી ક્રાઇમ બ્રાન્ચને રાજકુન્દ્રા સામે ઠોસ પુરાવા મળી આવ્યા હોવાનું કહેવાય છે. અલબત આ પબ્લિક ફીગર હોવાને કારણે ક્રાઇમ બ્રાન્ચ મુંબઇ દ્વારા તમામ મજબૂત પૂરાવા રજૂ કરીને કાર્યવાહી કરવામાં આવી છે.

મુંબઈ સહિત સમગ્ર દેશમાં ચકચાર મચાવનાર પોર્ન ફિલ્મ રેકેટનું કનેક્શન સુરત સુધી પહોંચ્યા બાદ હવે રાજ કુંદ્રા સુધી પહોંચ્યું છે. મુંબઈ ક્રાઈમ બ્રાંચ ફેબ્રુઆરી મહિનામાં સુરતથી તન્વીર હાશમીને ભાટપોર નજીકથી ઉંચકી ગઈ હતી. મુંબઈ ક્રાઈમ બ્રાંચની ટીમએ મુંબઇના મડ આઇલેન્ડ ખાતે પોર્ન ફિલ્મોનું શુટીંગ થઇ રહ્યાનું ધ્યાન પર આવતા દરોડા પાડ્યા હતા. ક્રાઈમ બ્રાંચની ટીમએ ત્યાંથી પાંચ વ્યક્તિને ઝડપી પાડ્યા હતા. ફિલ્મમાં કામ કરનારી મોડેલ ગહના વશિષ્ટ સહિત એક કંપનીના ડિરેક્ટર ઉમેશ કામત, હોટહીટ મુવીઝ એપના સંચાલક શાન બેનર્જી ઉર્ફે દિવાંકર ખાસનવીસની ધરપકડ કરવામાં આવી હતી.

તપાસ દરમિયાન સુરતમાં રહેતા તન્વીર હાશમીની મહત્વની ભૂમિકા હોવાનું સામે આવ્યું હતું. તન્વીર ફોર્ન ફિલ્મો બનાવતો અને વેચતો હતો. તન્વીર હાશમીની પણ મહત્વની ભૂમિકા હોવાનું ધ્યાન પર આવતા મુંબઇ ક્રાઇમ બ્રાંચની ટીમ સુરત દોડી આવી હતી. સુરત ભાટપોર ખાતેથી તન્વીરની ધરપકડ કરી મુંબઈ લઈ ગઈ હતી. તેની પુછપરછમાં પોર્ન ફિલ્મ મેકીંગનો રેલો રાજ કુંદ્રા સુધી પહોંચ્યો હતો.

તન્વીર સુરતમાં અડાજણ, ઇચ્છાપોર, બારડોલીના ફાર્મ હાઉસમાં પણ ફિલ્મો બનાવતો હતો. તેની ફિલ્મમાં ગહેનાએ પણ કામ કર્યું હતું. અને રાજ કુંદ્રાએ ગહેનાની ફિલ્મોને પણ એપ પર વેચી હતી. જેથી રાજ કુંદ્રા સાથે સ્પષ્ટ સંડોવણી દેખાઈ આવી હતી. તન્વીર સુરતના ચોક બજાર વિસ્તારમાં રહેતો હતો. તન્વીરે સુરતની અડાજણ, ઇચ્છાપોર, સ્ટેશન પાસેની અનેક હોટેલોમાં પોર્ન ફિલ્મોની શુટીંગ કરી છે.

પહેલી ઓગષ્ટથી 9મી ઓગષ્ટ સુધી રૂપાણી સરકારના પાંચ વર્ષની આ રીતે કરાશે ઉજવણી

મુખ્ય મંત્રી વિજય રૂપાણીના નેતૃત્વ હેઠળ ગુજરાતમાં અનેક જન ઉપયોગી યોજનાઓનો આરંભ થયો અને યોજનાઓનો લાભ પણ પ્રજાજનોને થયો છે. રૂપાણીના નેતૃત્વમાં ભાજપ સરકારને આગામી ઓગસ્ટ માસમાં પાંચ વર્ષ પૂર્ણ થશે તેના નિમિત્તે “પાંચ વર્ષ આપણી સરકારના- સૌના સાથ, સૌના વિકાસના” અંતર્ગત રાજ્યભરમાં વિવિધ કાર્યક્રમો થકી રાજ્યની અવિરત વિકાસ યાત્રાને વધુ વેગવંતી બનાવવાનો નિર્ણય લેવામાં આવ્યો છે.

કેબીનેટ બેઠકમાં આ નવ દિવસની ઉજવણીના કાર્યક્રમને આખરી ઓપ આપવામાં આવ્યો હતો. જેમાં તા. ૦૧ ઓગષ્ટ-૨૦૨૧-જ્ઞાનશક્તિ દિવસ, ૦ર ઓગષ્ટ-સંવેદના દિવસ, ૦૪ ઓગષ્ટ-નારી ગૌરવ દિવસ, ૦૫ ઓગસ્ટ-કિસાન સન્માન દિવસ, ૦૬ ઓગસ્ટ-રોજગાર દિવસ, ૦૭ ઓગસ્ટ-વિકાસ દિવસ, ૦૮ ઓગસ્ટ-શહેરી જન સુખાકારી દિન અને ૦૯ ઓગસ્ટ-વિશ્વ આદિવાસી દિવસની ઉજવણી કરાશે.

કેબીનેટ બેઠક બાદ ગાંધીનગરમાં ગૃહ રાજય મંત્રી પ્રદિપસિંહ જાડેજાએ જણાવ્યું હતું કે આ કાર્યક્રમ અંતર્ગત મુખ્ય મંત્રી વિજય રૂપાણી અને નાયબ મુખ્ય મંત્રી નીતિન પટેલના નેતૃત્વ હેઠળ સુશાસનના પાંચ વર્ષની જન ભાગીદારીથી જન ઉપયોગી કાર્યો- સેવાઓને વધુ સઘન બનાવાશે અને વિવિધ ફ્લેગ શીપ યોજનાઓનો વ્યાપ પણ વધારાશે. એટલુ જ નહીં, વર્તમાન કોરોનાના સંક્રમણની પરિસ્થિતિને ધ્યાને રાખીને તમામ કોવિડ પ્રોટોકોલ અને નીતિ નિયમોનું ચુસ્ત પાલન કરીને રાજ્યભરમાં આ વિવિધ કાર્યક્રમોનુ આયોજન કરાશે.

 

 

26 જુલાઈથી ગુજરાતમાં ધોરણ 9 થી 11નું ફિઝીકલ શૈક્ષણિક કાર્ય શરુ કરાશે

મુખ્યમંત્રી વિજય રૂપાણીના અધ્યક્ષસ્થાને મળેલી કોર કમિટીની બેઠકમાં આ અંગેનો નિર્ણય લેવામાં આવ્યો છે. કોર કમિટીના આ બેઠકમાં રાજ્યમાં કોરોના સંક્રમણની સ્થિતિ અને ઉત્તરોત્તર ઘટતા જતા કોવિડ કેસોની સંખ્યાને ધ્યાનમાં લઈ દૈનંદીની પ્રવૃત્તિઓ શાળાવર્ગો વગેરે રાબેતા મુજબ પૂર્વવત કરવા અંગે વિસ્તૃત સમીક્ષા અને ચર્ચા-વિચારણા કરવામાં આવી હતી.

મુખ્યમંત્રી રૂપાણીએ તદઅનુસાર સમગ્ર રાજ્યમાં આગામી 26 તારીખ જુલાઈ 2021 થી શાળાઓના ધોરણ 9 થી 11 ના વર્ગો શરૂ કરવાનો નિર્ણય કર્યો છે.

આ વર્ગો 50 ટકા ક્ષમતા સાથે ફરી શરૂ કરી શકાશે. એટલું જ નહિ વિદ્યાર્થીઓની હાજરી મરજિયાત રાખવામાં આવી છે. શાળા વર્ગોમાં અભ્યાસ માટે આવનારા વિદ્યાર્થીઓએ પોતાના વાલીનુંસંમતિપત્રક પણ લાવવાનું રહેશે. આ સાથે ઓનલાઈન એજ્યુકેશન સિસ્ટમ પણ યથાવત ચાલુ રાખવામાં આવશે તેવો નિર્ણય પણ મુખ્યમંત્રીએ કોર કમિટીમાં કર્યો છે. ધોરણ 9 થી 11 ના વર્ગો આગામી 26 જુલાઈ 2021 થી શાળાઓમાં શરૂ થાય ત્યારે કોરોના સંક્રમણ નિયંત્રણની ગાઈડલાઈન્સ- SOPનું પાલન થાય તે પણ શિક્ષણ વિભાગે સુનિશ્ચિત કરાવવાનું રહેશે.

રાજ્ય સરકારે આ અગાઉ તારીખ 9 જુલાઈથી ઉચ્ચત્તર માધ્યમિક ધોરણ 12ના વર્ગો તેમજ ડિપ્લોમા-ડિગ્રીના કોલેજ વર્ગો 50 ટકા કેપેસિટીથી શરૂ કરાવેલા છે. હવે, ધોરણ 9 થી 11 ના શાળા વર્ગો પણ ભૌતિક રીતે આગામી તારીખ 26 જુલાઈથી શરૂ થશે.

કોર કમિટીના આ બેઠકમાં નાયબ મુખ્યમંત્રી નીતિન પટેલ, શિક્ષણમંત્રી ભૂપેન્દ્રસિંહ ચુડાસમા, ઉર્જા મંત્રી સૌરભ પટેલ, ગૃહરાજ્ય મંત્રી પ્રદિપસિંહ જાડેજા તેમજ મુખ્યસચિવ અનિલ મુકિમ, મુખ્યમંત્રીના મુખ્ય અગ્ર સચિવ કૈલાસનાથન, ગૃહ વિભાગના અધિક મુખ્ય સચિવ પંકજકુમાર, મુખ્યમંત્રીના અધિક મુખ્ય સચિવ એમ.કે.દાસ, આરોગ્યના અધિક મુખ્ય સચિવ મનોજ અગ્રવાલ અને અન્ય સચિવો ઉપસ્થિત રહ્યા હતા.

પાંચ હજાર કરોડનું કૌભાંડ: સાંડેસરા બંધુઓની સંપત્તિની કરાશે હરાજી

વડોદરા જિલ્લામાં એક સમયે જાણીતું નામ એવા નિતીન સાંડેસરા અને ચેતન સાંડેસરા દ્વારા સ્ટર્લિંગ બાયોટેક લી. શરૂ કરવામાં આવી હતી. જો કે, થોડાક સમય બાદ સાંડેસરા બંધુઓનું હજારો કરોડનું બેંક લોન કૌભાંડ સામે આવ્યું હતું અને હાલ કંપની સામે કાર્યવાહી એનસીએલટીમાં ચાલી રહી છે, ત્યારે હવે ફડચા અધિકારી એડવોકેટ મમતા બિનાનીની દેખરેખ હેઠળ કંપનીની રૂપિયા ૫૪૮ કરોડની સંપત્તિની ઓનલાઇન હરાજી કરવાનો નિર્ણય લેવામાં આવ્યો છે. જે અંગે આજરોજ પબ્લિક નોટીસ પ્રસિદ્ધ કરવામાં આવી હતી.

સ્ટર્લિંગ બાયોટેક લી.ના નિતીન સાંડેસરા અને ચેતન સાંડેસરાનું વડોદરા નહિ સમગ્ર રાજ્ય અને મુંબઇ તથા દિલ્હી સુધી દબદબો હતો. વડોદરામાં જાણીતા ગરબાનું આયોજન દર વર્ષો સાંડેસરા બંધુઓ દ્વારા કરવામાં આવતું હતું. અને બિઝનેસ વર્તુળોમાં તેમની ભારે પકડ હતી. જો કે, સાંડેસરા બંધુઓનો દબદબો અને સ્ટર્લિંગ જુથની ખ્યાતી લાંબો સમય ટકી ન હતી.

સ્ટર્લિંગ બાયોટેક લી.ના સંચાલકો નિતીન સાંડેસરા અને ચેતન સાંડેસરા તથા સ્ટર્લિંગ જૂથની અન્ય કંપનીઓની મળીને હજારો કરોડ રૂપિયાનું બેંક લોન કૌભાંડ સામે આવ્યું હતું. જેમાં પ્રથમ સીબીઆઇ અને ત્યાર બાદ દેશની અગ્રણી તપાસ સંસ્થાઓ તપાસાર્થે જોડાઇ હતી. હાલ સાંડેસરા બંધુઓ સહપરિવાર દેશની બહાર છે. અને સરકારની પકડથી દૂર છે.

કોરોના કાળમાં લોકડાયરા અંગે લોક ગાયિકા ગીતા રબારીને મોટી રાહત, હાઈકોર્ટે કર્યો મનાઈ હુકમ

ગુજરાત રાજ્યની લોકગાયિકા ગીતા રબારીને ગુજરાત હાઈકોર્ટ માંથી મોટી રાહત મળી છે. હાઈકોર્ટે ગીતા રબારી વિરુદ્ધ કાર્યવાહી મામલે વચગાળાનો મનાઈ હુકમ ફરમાવ્યો છે. જેમાં કોર્ટે જણાવ્યું છે કે લોકગાયિકા ગીતા રબારી વિરુદ્ધ હાલમાં કોઈપણ પ્રકારના પગલાં લેવામાં આવશે નહીં.

કોરોના કાળમાં ભુજ ના રેલડી ગામમાં લોકડાયરા નું આયોજન કરવા મામલે ગીતા રબારી સામે ફરિયાદ નોંધાઈ હતી

ફરિયાદ રદ કરવા મામલે ગીતા રબારીએ હાઇકોર્ટમાં અરજી કરી હતી

અવારનવાર વિવાદમાં આવતી લોકગાયિકા ગીતા રબારી સહિતના કલાકારો સામે જાહેરનામાના ભંગ અંગેની ફરિયાદ નોંધાઇ છે. મહત્વનું છે કે, ભૂજ નજીક રેલડીમાં ફાર્મ હાઉસમાં કોવિડના નિયમોના ધજાગરા ઉડાવીને ડાયરાનું આયોજન કરાયું હતું. જેમાં ગીતા રબારી, નિલેષ ગઢવી અને લક્ષ્મણ બારોટ સહિતના કલાકારો ઉપસ્થિત રહ્યાં હતાં.

રાજકુંદ્રા પોર્નગ્રાફી પ્રકરણનો રેલો સુરત સુધી, સુરતના તન્વીરની મુંબઈ ક્રાઈમ બ્રાંચ દ્વારા પૂછપરછ

મુંબઈ ક્રાઈમ બ્રાંચ દ્વારા મડ આઈલેન્ડમાં રાજ કુંદ્રા દ્વારા ચલાવવામાં આવી રહેલા પોર્ન ફિલ્મ મેકિંગનો પર્દાફાશ કરવામાં આવ્યો છે. થોડા મહિના પહેલા સુરતમાંથી તન્વીરને પણ પોર્ન ફિલ્મ મેકિંગના કેસમાં મુંબઈ ક્રાઈમ બ્રાંચ ઉચકી ગઈ હતી. આ કેસમાં તન્વીરના રોલની પણ તપાસ થાય તેવી શક્યતા છે. ઓછા ખર્ચે બનતી પોર્ન ફિલ્મોનો કરોડોનો બિઝનેસ હોય છે.

પોર્ન ફિલ્મોનું ચલણ વર્ષોથી ચાલતું આવ્યું છે. પરંતુ આ પહેલા ક્યારેય પણ મુંબઈ અને સુરત જેવી સિટી પોર્ન ફિલ્મ મેકિંગનું હબ નહોતું. પરંતુ છેલ્લા કેટલાક વર્ષોમાં મુંબઈ સહિતની મેટ્રો સિટી પોર્ન ફિલ્મ મેકિંગ માટેનું હબ બની રહ્યું છે. પોર્ન ફિલ્મોની મેકિંગમાં જ્યારે નામચીન વ્યક્તિઓ પડતા હોય ત્યારે તેમાંથી થકી કમાણીનો અંદાજ લગાવી શકાય છે. સુરતમાંથી પકડાયેલો તન્વીર એક પોર્ન ફિલ્મ 12 થી 15 લાખના ખર્ચે બનાવી તેમાંથી 50 લાખથી વધારે કમાણી કરતો હતો.

બોલીવુડની પ્રખ્યાત અભિનેત્રી શિલ્પા શેટ્ટીના પતિ રાજ કુંદ્રા દ્વારા મોટા પાયે પોર્ન ફિલ્મો બનાવી તેને મોબાઈલ એપ્લિકેશન દ્વારા તથા ઓટીટી પર મુકવામાં આવતી હતી. રાજ કુંદ્રા રોજના લાખો રૂપિયા કમાતો હતો. સ્ટ્રગલર યુવક યુવતીઓ પાસેથી સીનની ડિમાન્ડ ઉભી કરાવી આ પ્રકારની ફિલ્મો મુકી તેના માધ્યમથી મહિને કરોડોની કમાણી કરતા હતા. પોર્ન ફિલ્મ મેકિંગમાં સૌથી પહેલા સુરતમાંથી તન્વીર પકડાયો હતો. જેથી તન્વીરના રાજ કુંદ્રા સાથે કનેક્શન છે કે કેમ તેની પણ તપાસ ક્રાઈમ બ્રાંચ દ્વારા કરવામાં આવશે.

આવા કેસોમાં આરોપી સામે આઈટી એક્ટ અને આઈપીસીની કલમો હેઠળ વારંવાર કેસ નોંધાય છે. જો કોર્ટ આરોપીને દોષી ઠેરવે છે, તો તેને ઘણા વર્ષો જેલમાં પસાર કરવા પડી શકે છે. પોર્નોગ્રાફી અને અશ્લીલ સામગ્રીને લગતા આપણા બંધારણ પાસે ખૂબ જ કડક કાયદા છે. આવા કેસોમાં આઈટી એક્ટની સાથે આરોપીઓ વિરુદ્ધ ભારતીય દંડ સંહિતા એટલે કે આઈપીસીની ઘણી કલમો પણ લખાઈ છે. ઇન્ટરનેટના વિકાસ અને આધુનિક તકનીકીના વિકાસ પછી, આઇટી એક્ટમાં પણ સુધારો કરવામાં આવ્યો હતો. જેથી આજના સમયમાં આવા કેસોમાં દોષી ઠરેલી વ્યક્તિને કડકથી કડક સજા થઈ શકે.

અખબારી જગતમાં ખળભળાટ: ગુજરાત સહિત દેશભરમાં દૈનિક ભાસ્કર જૂથની ઓફિસો પર દરોડા

આવકવેરા વિભાગ દ્વારા હિન્દી અખબાર દૈનિક ભાસ્કર જૂથની તમામ કચેરીઓ પર દરોડા પાડવામાં આવ્યા છે. આવકવેરા વિભાગની તપાસ વિંગ દ્વારા દરોડા પાડવામાં આવી રહ્યા છે. એક સાથે તમામ કચેરીઓ પર પ્રથમ સવારે દરોડા પાડવામાં આવ્યા છે. દરોડા દરમિયાન ઓફિસમાં હાજર જવાનોના ફોન લેવામાં આવ્યા છે. તેમજ કોઈને પણ બહાર જવા દેવા નથી. દરોડાનાં પગલે અખબારી જગતમાં ખળભળાટ વ્યાપી ગયો છે.

સમાચાર એજન્સી એએનઆઈ અનુસાર, કરચોરીના કિસ્સામાં આવકવેરા વિભાગ આ દરોડા પાડી રહ્યો છે. આ દરોડા નોઈડા, જયપુર, ભોપાલ, ઈન્દોર, મુંબઇ અને પટના સહિત દેશભરની officesફિસો પર ચાલી રહ્યો છે. આ સાથે, આવકવેરા વિભાગ જૂથના માલિકોના ઘરે પણ દરોડા પાડી રહ્યો છે. આ જૂથ મીડિયા વ્યવસાય તેમજ અન્ય વ્યવસાય સાથે સંકળાયેલ છે.

સૂત્રોના જણાવ્યા અનુસાર, ગ્રુપ દ્વારા આપવામાં આવેલા દસ્તાવેજોથી ઇન્કમટેક્સ વિભાગ સંતુષ્ટ નહોતો. આ પછી કરચોરીના કેસની તપાસ માટે આ દરોડા પાડવામાં આવ્યા છે. આવકવેરા વિભાગ દ્વારા આ અંગે કોઈ વધુ માહિતી આપવામાં આવી નથી. કચેરીની બહાર પોલીસ ગાર્ડ પણ હાજર હોય છે. કોઈને અંદર પ્રવેશવાની મંજૂરી નથી. તેમજ કોઈ બહાર નીકળી શકતું નથી. આવકવેરા વિભાગની ટીમ સાથે સીઆરપીએફના જવાનો પણ હાજર છે.

હવે ગુજરાતમાં “ખેલા હોબે”, અમદાવાદમાં લાગ્યા મમતા બેનર્જીના પોસ્ટર

પશ્ચિમ બંગાળની વિધાનસભાની ચૂંટણીમાં વિજય બાદ હવે મુખ્યમંત્રી મમતા બેનર્જી અન્ય રાજ્યો પર નજર રાખી રહ્યા છે. સીએમ મમતા અને તેમની પાર્ટી તૃણમૂલ કોંગ્રેસ (ટીએમસી) ની નજર હવે વડા પ્રધાન નરેન્દ્ર મોદીના ગૃહ રાજ્ય ગુજરાત પર છે, જ્યાં આવતા વર્ષે વિધાનસભાની ચૂંટણીઓ યોજાવાની છે.

મુખ્યમંત્રી મમતા બેનર્જી હવે બંગાળ પછી ગુજરાતમાં પણ ‘ખેલા હોબે’ કરવાના મૂડમાં છે અને તેમણે આ અંગેની તૈયારી શરૂ કરી દીધી છે. મમતા બેનર્જી 21 જુલાઈને શહીદ દિવસ તરીકે ઉજવે છે અને બુધવારે મમતા આ દિવસે દેશભરમાં વર્ચુઅલ રેલી યોજવા જઈ રહ્યા છે.

હમણાં સુધી મમતા બેનર્જી શહીદ દિનનો કાર્યક્રમ કોલકાતા અને બંગાળ સુધી મર્યાદિત રાખતા હતા, પરંતુ હવે તે દેશના ઘણા રાજ્યોમાં વર્ચુઅલ મીટિંગો યોજવા જઇ રહી છે. ગુજરાતમાં, આ વર્ચ્યુઅલ મીટિંગના બેનરો ગુજરાતી ભાષામાં જ લગાવવામાં આવ્યા છે.

અમદાવાદના સ્ટેટ ટ્રાન્સપોર્ટ બસ સ્ટેન્ડ ખાતે ગુજરાતી ભાષામાં મુકવામાં આવેલા આ બેનરો પર લખ્યું છે કે 21 જુલાઈના રોજ મમતા દીદી બપોરે 2 વાગ્યે વર્ચ્યુઅલ સંબોધન કરશે.

ગુજરાતમાં મમતા બેનર્જીની તસવીરવાળા બેનરો ઘણું કહે છે. ગુજરાતમાં મમતાની તસવીર સાથે બેનરો લગાવવામાં આવ્યા તેવું પહેલીવાર બની રહ્યું  છે.

બંગાળમાં વિજય બાદ મમતા દીદીએ બુલંદ હોસલા સાથે ગુજરાતના ચૂંટણી મેદાનમાં ઉતરવાની તૈયારી શરૂ કરી દીધી છે.