ગત વર્ષે ગુજરાતમાં યોજાયેલી વિધાનસભા ચૂંટણીમાં ભારતીય જનતા પાર્ટી(BJP)એ 156 બેઠકો જીતીને ઈતિહાસ સર્જ્યો હતો. ભાજપે પ્રચાર માટે અધધ રકમ ખર્ચી હતી. ચૂંટણી પંચ (ECI) પાસે ચૂંટણી દરમિયાન થયેલા ખર્ચની વિગતો ફાઇલ કરતા ભજાપના સ્ટેટ યુનિટે જણાવ્યું પાર્ટીએ ગત ગુજરાત વિધાનસભાની ચૂંટણીમાં રૂ.209.97 કરોડનો ખર્ચ કર્યો હતો. અગાઉ વર્ષ 2017ની વિધાનસભા ચૂંટણી દરમિયાન પાર્ટીએ રૂ.111 કરોડ રૂપિયાનો ખર્ચ કર્યો હતો ત્યારે ભાજપને 99 બેઠકો મળી હતી.
ચૂંટણી પંચની વેબસાઈટ પર ચૂંટણી ખર્ચના રીપોર્ટમાં ભાજપનો ખર્ચ કુલ રૂ. 209.97 કરોડ દર્શાવવામાં આવ્યો છે, જેમાંથી રૂ. 163.77 કરોડ પક્ષના પ્રચાર માટે હોવાનું જણાવ્યું છે. ગુજરાત ભાજપે ECIને એમ પણ જણાવ્યું કે ચૂંટણી દરમિયાન મોટાભાગનો ખર્ચ રેલીઓ અને સ્ટાર પ્રચારકોની મુસાફરી, પ્રચાર સામગ્રીના છાપકામ અને અન્ય સામાન્ય પ્રચાર પ્રવૃત્તિઓ પર કરવમાં આવ્યો હતો.
ભાજપે ફાઇલિંગમાં જણાવ્યું હતું કે ઉમેદવારો પાછળ 46.20 કરોડ રૂપિયાનો ખર્ચ કરવામાં આવ્યો હતો. આમાંથી 40 કરોડ રૂપિયા મેદાનમાં રહેલા ઉમેદવારોને ચૂંટણી ખર્ચ માટે ચૂકવવામાં આવ્યા હતા.
કેન્દ્રીય બીજેપી યુનિટે પ્રચાર દરમિયાન કેન્દ્રીય પ્રધાનો નીતિન ગડકરી અને અમિત શાહની મુસાફરી પર રૂ. 2.88 કરોડનો ખર્ચ જાહેર કર્યો હતો. આ ઉપરાંત ભાજપે જણાવ્યું હતું કે તેમણે મીડિયા જાહેરાતો પાછળ માત્ર રૂ. 27 લાખનો જ ખર્ચ “Google India” પર કર્યો હતો.
ગત ગુજરાત વિધાન સભા ચૂંટણીમાં 182માંથી માત્ર 17 બેઠકો જીતીને બીજા ક્રમે રહેલી કોંગ્રેસે કુલ રૂ. 103.26 કરોડનો ખર્ચ જાહેર કર્યો હતો. કોંગ્રેસે પ્રચાર માટે રૂ. 47.19 કરોડનો ખર્ચ કર્યો હતો. જેમાં સ્ટાર પ્રચારકોના પ્રવાસ પાછળ રૂ. 13.76 લાખ, જાહેર સભાઓ અને રેલીઓમાં રૂ. 61.56 લાખ અને પક્ષના ઉમેદવારોને રૂ. 45.35 કરોડ ચૂકવવામાં આવ્યા હતા.
AAP જે પાંચ બેઠકો સાથે ત્રીજા સ્થાને રહી હતી તેણે ગુજરાત વિધાનસભ ચૂંટણીમાં કુલ ખર્ચ રૂ.33.8 કરોડ જાહેર કર્યો હતો.