નગરોટા હુમલામાં ખુલાસોઃ આતંકવાદી મસૂદ અઝહરના ભાઈએ રચ્યું ષડયંત્ર

ભારતીયના વીર જવાનોએ થોડા દિવસ અગાઉ પાકિસ્તાનના નાપાક ઈરાદાને નિષ્ફળ બનાવ્યો હતો. જમ્મુ કાશ્મીના નગરોટા ક્ષેત્રમાં જૈશ-એ-મોહમ્મદના ચાર આતંકવાદીઓને ફૂંકી મારવામાં આવ્યા હતા. પાકિસ્તાનની જાસૂસી એજન્સી આઈએસઆઈએ જૈશ-એ-મહોમ્મદને પુલવામા હુમલા જેવો જ આત્મઘાતી હુમલાને અંજામ આપવાની જવાબદારી સોંપી હતી. આ નાપાક મનસુબાના પાર પાડવા માટે સાંબા સેક્ટરમાંથી ચાર આતંકવાદીઓ ભારતમાં ઘુસણખોરી દ્વારા ઘૂસ્યા હતા. 18 અને 19 નવેમ્બરના જમ્મુ ક્ષેત્રના નગરોટા નજીક ટોલ પ્લાઝા પાસે એક ટ્રકમાં છુપાયેલા ચારેય આતંકવાદીઓને સુરક્ષાદળોએ અથડામણમાં ઠાર કર્યા હતા.

આ ચારેય આતંકવાદીઓને પુલવામામાં ફરીથી મોટી ઘટનાને અંજામ આપવાની જવાબદારી પાકિસ્તાનની ગુપ્તચર સંસ્થા આઈસએસઆઈએ મૌલાના મસુદ અઝહરના નેતૃત્વ હેઠળના સંગઠન જૈશ-એ-મોહમ્મદને સોંપી હતી. એક અહેવાલ મુજબ મસુદ અઝહરના ભાઈ અબ્દુલ રઉફ અસગરની દેખરેખમાં આ ઘુસણખોરી કરાવવામાં આવી હતી. ભારતીય સરહદ નજીક પાકિસ્તાનના જૈશના શકરગઢ કેમ્પમાંથી ચાર જેહાદીઓને પસંદ કર્યા હતા. હુમલાની યોજના માટે જૈશના વધુ એક આતંકવાદી કાઝી તરારને પણ રઉફ અસગરની સાથે રહેવા જણાવાયું હતું.

સૂત્રોના મતે બહાવલપુરમાં જૈશના હેડક્વાર્ટરમાં એક બેઠક યોજાઈ હતી જેમાં અબ્દુલ રઉફ અસગર, કાઝી તરાર અને આઈએસઆઈના અધિકારીઓ સહિત જૈશના આતંકવાદી નેટવર્કના મૌલાના અબુ જુંદાલ અને મફ્તી તૌસીફ પણ હાજર હતા.

પુલવામા જેવા બીજા હુમલાની યોજના માટે જૈશના શકરગઢ એકમના આતંકવાદીઓને પસંદ કરી તેમને વિશેષ તાલીમ આપવામાં આવી હતી. ચાર આતંકવાદીઓને આત્મઘાતી હુમલા માટે તાલીમ આપવામાં આવી હતી અને કાશ્મીર ખીણમાં ભારતીય પોસ્ટને વધુમાં વધુ નુકશાન પહોંચે તે હેતુથી દારુગોળાનો ઉપયોગ કરવાનો અભ્યાસ પણ કરાવાયો હતો.

જૈશના આતંકવાદીઓએ સાંબા સેક્ટરમાંથી ભારતીય સરહદમાં ઘુસવા માટે નદી કિનારાના વિસ્તારમાં નાળાના નેટવર્કનો ઉપયોગ કર્યો હતો અને જમ્મુના કઠુઆ તરફ સાંબાથી જાટવાલ છ કિલોમીટર સુધી એક ટ્રકમાં લાવવામાં આવ્યા હતા. સૂત્રોના મતે ઘુસણોખોરીના મહત્તમ પ્રયાસો આ સેક્ટરમાંથી જ પરોઢીયે 3-4 વાગ્યા આસપાસ થતા હોય છે.