ઇન્ડિયન રેલવેની તૈયારી : 15 એપ્રિલથી ફરી ટ્રેનો પાટે ચઢી દોડવા માંડશે

કોરોના વાયરસના કારણે પેસેન્જર ટ્રેનોને 21 દિવસ સુધી સ્થગિત કર્યા બાદ 15 એપ્રિલથી ફરીથી સેવાઓ શરૂ કરવાની ભારતીય રેલવે તૈયારીઓ કરી રહ્યું છે. સૂત્રોએ જણાવ્યું કે, રેલવેના તમામ સુરક્ષા કર્મચારીઓ, સ્ટાફ, ગાર્ડ, ટીટીઈ અને અન્ય અધિકારીઓને 15 એપ્રિલથી પોતાના કાર્યસ્થળ પર પરત આવવા માટે તૈયાર રહેવાનું કહેવામાં આવ્યું છે. ટ્રેનોનું સંચાલન સરકાર તરફથી લીલી ઝંડી મળ્યા બાદ જ શરૂ કરાશે.

સૂત્રોએ જણાવ્યું કે, તમામ 17 ઝોનને પોતાની સેવાઓ સંચાલિત કરવા માટે તૈયાર રહેવાનો સંદેશો આપવામાં આવ્યો છે. 15 એપ્રિલથી લગભગ 80 ટકા ટ્રેનો નિયમિત ટાઈમટેબલ અનુસાર દોડશે તેવી શક્યતા છે, જેમાં રાજધાની, શતાબ્દી તેમજ દુરંતો પણ સામેલ છે. સ્થાનિક ટ્રેનોની સેવા પણ ચાલુ થઈ શકે છે. સૂત્રોના જણાવ્યા પ્રમાણે, આ અઠવાડિઆના અંતમાં ઝોનને કાર્ય યોજના મોકલવામાં આવશે. વડાપ્રધાન દ્વારા 24 માર્ચે બંધ કરવાની જાહેરાત કર્યા બાદ રેલવેએ 21 દિવસ સુધી 13,523 ટ્રેનોની સુવિધા બંધ કરી દીધી છે. આ દરમિયાન માલગાડી ચાલુ છે. રેલવેની ટ્રેનોની સાથે-સાથે પ્રાઈવેટ ટ્રેનોમાં એડવાન્સ બુકિંગ થઈ ચૂક્યું છે.

ઉત્તર રેલવેના પ્રવક્તાએ કહ્યું કે, 15 એપ્રિલ 2020થી મેલ એક્સપ્રેસની સાથે-સાથે તમામ પ્રકારની પેસેન્જર ટ્રેન પોતાના સમય પર દોડશે. જેમાં ઈએમયૂ, એમઈએમયૂ, ડીએમયૂ અને તમામ પ્રકારની ગાડીઓ સામેલ છે. ટ્રેનો દોડે તે પહેલા તેની ટેકનિક ચેક કરાશે સાથે જ તમામ ટ્રેનોને સેનિટાઈઝ કરાશે. દેશમાં કેટલાક રૂટ પર પ્રાઈવેટ ટ્રેન ચલાવતી કંપની આઈઆરસીટીસીના સૂત્રોનું કહેવું છે કે, તેમણે પણ 15 એપ્રિલથી તમામ પ્રાઈવેટ ટ્રેન ચલાવવાની તૈયારી શરૂ કરી દીધી છે. આ સાથે તે ટ્રેનોમાં બુકિંગ પણ શરૂ કરવામાં આવ્યું છે.

કોરોના વાયરસના કારણે લોકોમાં એટલો ભય પેસી ગયો છે કે તેઓ ટ્રેનમાં મુસાફરી કરતાં ડરી રહ્યા છે. સામાન્ય દિવસોમાં જે ટ્રેનોમાં ટિકિટને લઈને માથાકૂટ થતી હતી તેમાં સીટો ખાલી છે. એસી એક્સપ્રેસ, લોકમાન્ય તિલક અને ચંડીગઢ એક્સપ્રેસ જેવી ટ્રેનોમાં દરેક ક્લાસમાં સરળતાથી કન્ફર્મ ટિકિટ મળી રહી છે. શુક્રવારે સાંજ સુધીમાં મુખ્ય ટ્રેનોની હજારો સીટો ખાલી હોવાથી લોકોમાં કેટલો ડર છે, તે સરળતાથી સમજી શકાય છે.