મુખ્યમંત્રી વિજય રૂપાણીની જાહેરાત : રેશનકાર્ડ ધારકોને પહેલી એપ્રિલથી અનાજ, કઠોળ, ખાંડ ફ્રીમાં

વડાપ્રધાન નરેન્દ્ર મોદીએ મંગળવારે રાત્રે જેવી સમગ્ર દેશમાં 21 દિવસનું લોકડાઉન કરવાની જાહેરાત કરી તેની સાથે જ ગરીબો અને રોજનું કમાઈને ખાનારા લોકોની હાલત દયનીય બની ગઈ છે. આવા લોકો માટે ગુજરાત સરકારે મોટો નિર્ણય લેતા 1 એપ્રિલથી દરેક રેશનકાર્ડ ધારકોને વ્યક્તિ દીઠ 3.5 કિલો ઘઉં, દોઢ કિલો ચોખા જ્યારે કુટુંબ દીઠ 1 કિલો દાળ, 1 કિલો ખાંડ અને 1 કિલો મીઠું વિનામૂલ્યે આપવામાં આવશે. રેશનકાર્ડની દુકાનોમાંથી આ જથ્થાનું વિતરણ શરુ કરાશે.

રુપાણીએ જણાવ્યું હતું કે સરકારની આ જાહેરાતનો 60 લાખ કુટુંબના સવા ત્રણ કરોડ લોકોને મળશે, અને તેમને કામધંધા ઠપ્પ થઈ ગયા છે ત્યારે જીવનજરુરી ચીજવસ્તુઓ માટે મુશ્કેલી નહીં વેઠવી પડે. રુપાણીએ એમ પણ કહ્યું હતું કે, આગામી સમયમાં સરકાર લોકડાઉનથી સૌથી વધુ અસરગ્રસ્ત થયેલા લોકોને માટે અન્ય સહાયતા આપવા પણ વિચાર કરાઈ રહ્યો છે, અને તેની આગામી દિવસોમાં જાહેરાત કરવામાં આવશે.

લોકડાઉન દરમિયાન લોકોને પોતાના ઘરમાં જ રહેવા માટે વિનંતી કરતા જણાવ્યું હતું કે પ્રજાને તકલીફ ના પડે તે માટે રાજ્ય સરકાર સંપૂર્ણ ધ્યાન રાખી રહી છે અને કોઈ ચીજવસ્તુની અછત નથી સર્જાવાની, જેથી લોકો ઘરોની બહાર નીકળવાનું ટાળે. સરકારના આ નિર્ણય અંગે સસ્તા અનાજની દુકાનદારોના યુનિયનના વડા પ્રહલાદ મોદીએ જણાવ્યું હતું કે બાયોમેટ્રિક સિવાય માલ આપવો નહીં, પરંતુ તેનો રેશનિંગની દુકાનદારો વિરોધ કરી રહ્યા છે. તેમણે જણાવ્યું હતું કે દુકાનદારો બિલ બનાવી આપવા તૈયાર છે, પરંતુ બાયોમેટ્રિક સિસ્ટમથી જો માલ વેચવાની ફરજ પાડવામાં આવશે તો તેનાથી કોરોના ફેલાવવાનો ડર વધશે.