કોરોનાને કારણે લગ્ન ઇચ્છુકો પર પણ મોટી અસર : એપ્રિલમાં જેમના લગ્ન છે તેમના માતા-પિતા મૂંઝવણમાં

કોરોનાના પ્રકોપે આખા વિશ્વમાં એવો દાટ વળ્યો છે કે જેના કારણે મોટાભાગના દેશોમાં ટ્રાવેલ બેન લાગી ગયો છે, વળી મોટાભાગના દેશોમાં તો લોકોએ ઘરમાંથી બહાર નીકળવાનું પણ બંધ કરી દીધું છે. કોરોનાની અસર માત્ર વેપાર ધંધા પર જ નથી પડી પણ સાથે જ તેની અસર લગ્ન પર પણ જોવા મળે તેવી સંભાવના છે. ૧૪મી એપ્રિલ, ૨૦૨૦થી મીનાર્ક કમુરતા પૂર્ણ થશે અને આગામી ૨૦ એપ્રિલ, ૨૦૨૧ના એક વર્ષના સમયગાળા દરમિયાન લગ્ન માટે ગુજરાતમાં ૩૭૧ દિવસોમાંથી માત્ર ૩૦ જ લગ્નમુહૂર્ત છે. તેમાં પણ ૧૪મી એપ્રિલ,૨૦૨૦થી ૨૪મી મે, ૨૦૨૦ સુધી ૧૫ મુહૂર્ત છે. જોકે, વર્તમાન વૈશ્વિક કોરોના પ્રકોપને કારણે જેમનાં સંતાનોનાં લગ્ન છે, તેઓ પણ ગોર મહારાજ સમક્ષ પોતાની મૂંઝવણ વ્યકત કરી રહ્યાં છે.

હાલ તો ૩૧મી માર્ચ સુધી સાર્વજનિક મેળાવડા વગેરે સ્થગિત કરાયું છે, પરંતુ જો આ સ્થિતિ લાંબી ચાલશે તો સમૂહલગ્નથી માંડીને વ્યકિતગત લગ્નગાળામાં તેની સીધી અસર જોવા મળી શકે તેમ છે. વર્તમાન કોરોના પ્રકોપને કારણે જેમના સંતાનોના લગ્ન છે, તેવા વર-કન્યા પક્ષના વડીલોને લગ્નનું મુહૂર્ત-તારીખ નજીક આવતા તેઓની મૂંઝવણ અત્યારથી વધી ગઈ છે. જેઓ બીજા રાજય કે અમેરિકા-કેનેડા વગેરેથી આવવાના છે, તેવા NRI મહેમાનોએ પણ અત્યારથી સન્માન અને પ્રેમપૂર્વક નકાર ભણી, દૂરથી આશીર્વાદ પાઠવી દીધા હોવાની વિગતો જણાવી રહ્યાં છે. તેમણે જણાવ્યું કે એક તો આ વર્ષે લગ્નનાં મુહૂર્ત ઓછા છે અને તેમાં કોરોનાની અસરને કારણે અનેક લોકો મૂંઝવણમાં મૂકાઈ ગયા છે.

આ વર્ષે ગુજરાતમાં મીનાર્ક કમુર્તા બાદ એટલે કે ૧૪મી એપ્રિલ, ૨૦૨૦ બાદ ૨૦મી એપ્રિલ, ૨૦૨૧ સુધીમાં લગ્નનાં શાસ્ત્રોકત મુહૂર્ત માત્ર ૩૦ જ છે. જોકે, ડિસેમ્બરમાં કારતક વદમાં માત્ર છ જ મુહૂર્ત છે. એટલે કે જાન્યુઆરી, ફેબ્રુઆરી, માર્ચ અને તા.૨૦મી એપ્રિલ સુધી શુદ્ઘ શાસ્ત્રોકત મુહૂર્ત પ્રાપ્ત થતાં નથી. તેને કારણે ‘દુકાળમાં અધિક માસ’ની જેમ લગ્નનાં અલ્પ મુહૂર્ત અને કોરોનાનો ભય વર-કન્યાનાં વડીલો માટે ચિંતાનો વિષય બની ગયો છે. શા માટે આવું થશે? લગ્નનાં મુહૂર્ત ઓછા હોવાનું કારણ આ મુજબ છે ૩૦ મે, ૨૦૨૦થી ૯ જૂન, ૨૦૨૦ સુધી શુક્ર અસ્ત, ૧ જુલાઈ, ૨૦૨૦થી ૨૬ નવેમ્બર, ૨૦૨૦ સુધી હિંદુ ચાતુર્માસ, ૧૫ ડિસેમ્બર, ૨૦૨૦થી ૧૪ જાન્યુઆરી, ૨૦૨૧ ધનાર્ક કમુર્તા,૧૬ જાન્યુઆરી, ૨૦૨૧થી ૧૧ ફેબ્રુઆરી, ૨૦૨૧ સુધી ગુરુ અસ્ત, ૧૪ ફેબ્રુઆરી, ૨૦૨૧થી ૨૦ એપ્રિલ, ૨૦૨૧ સુધી શુક્ર અસ્ત, કમુર્તા તથા ગુરુ-શુક્ર અસ્તમાં સીમંત થઈ શકે છે, પરંતુ તે સિવાય કોઈ માંગલિક કાર્ય થઈ શકતા નથી. લગ્નાદિ સંસ્કાર કાર્યો થઈ શકતા નથી.