રાજ્યસભાની ચૂંટણીમાં સોદાબાજીને લઈ જિજ્ઞેશ મેવાણીએ કહ્યું”વેચાયેલો માલ પરત ન લેતાં”

ગુજરાત રાજ્યસભાની ચૂંટણીમાં થઈ રહેલી સોદાબાજી અંગે વડગામના અપક્ષ ધારાસભ્ય જિજ્ઞેશ મેવાણીએ ગુજરાતની જનતાને સંબોધીને સોશિયલ મીડિયામાં પત્ર લખ્યો છે. આ પત્રમાં જિજ્ઞેશ મેવાણીએ શરૂઆતમાં જ જણાવ્યું કે અત્યંંત શરમપૂર્વક આ પત્ર લખી રહ્યો છું.

પત્રમાં તેમણે લખ્યું છે કે શરમ એ વાતની છે કે હું ગુજરાતની જે વિધાનસભામાં વડગામ મતવિસ્તારનું પ્રતિનિધિત્વ કરું છું એ વિધાનસભાના કેટલાક  ધારાસભ્યો એ હદે બાજારુ થઈ ગયા છે કે કોઈપણ પક્ષ એમની સામે રૂપિયાનો ઢગલો કરે તો પોતે જાણે બજારમાં વેચાવા ઉભેલી પ્રોડકટ હોય એમ પોતાની જાતને વેચવા તૈયાર થઈ ગયા છે. રાજ્યસભાની ચૂંટણી ટાણે જે ધારાસભ્યોએ કોંગ્રેસ પક્ષમાંથી રાજીનામાં આપ્યા છે એ લોકોએ સોદાબાજી વિના કે રૂપિયા ખાધા વિના રાજીનામા દીધા હોય એવું હું માનતો નથી. જોકે, શરમ એ વાતની પણ છે કે રાષ્ટ્રવાદની વાતો કરનારા રાજકીય પક્ષો પણ આવા ધારાસભ્યોને મોં માંગ્યા દામે ખરીદવા તૈયાર બન્યા છે. આ રીતે ખરીદનાર અને વેચનારા બેયનું શું કહેવું!

તેમણે કહ્યું કે આકરા શબ્દપ્રયોગ બદલ માફ કરજો, પણ એ હકીકત છે કે ભારતીય જનતા પાર્ટી જાણે કોઈ ગારબેજ-યાર્ડ કે આખા ગામનો ઉકરડો હોય એમ તમામ કચરો સ્વીકારવા સદા તૈયાર હોય છે. ભારતીય જનતા પાર્ટી ફકત એક વાતનો જવાબ આપે કે ભાજપના વર્ષોથી કામ કરતાં કાર્યકરો – નેતાઓએ નવા જોડાયેલા કોંગ્રેસના આ દોગલાં નેતાઓ માટે પાથરણા બિછાવવાવા ?

તેમણે લખ્યું છે કે આવા ચારિત્રહીન, વેચાવા તૈયાર અને ખરીદવા રેડી બનેલા સત્તા-સંપત્તિના સ્વામીઓને કાયમ માટે ચોકડી મારીશું નહીં તો રાજકીય સોદાબાજીનું આ શર્મનાક ક્લ્ચર ક્યારેય ખતમ નહીં થાય. આ કલ્ચર ખતમ કરવાની જવાબદારી રાજકીય પક્ષો કરતાં ગુજરાતની સાડા 6 કરોડ જનતાની છે.

તેમણે લખ્યું છે કે ગુજરાતની જનતા એ વેચાવા તૈયાર થયેલા આ ધારાસભ્યોને સવાલ પૂછવાની જરૂર છે કે તમે આ દેશની જનતાને સમજો છો શું? તમારાં મત વિસ્તારના જે લોકોએ ખોબલે-ખોબલે વોટ આપી તમને વિધાનસભામાં સ્થાન અપાવ્યું એ જનતા પ્રત્યે તમારી કોઈ વફાદારી છે કે કેમ? તમારામાં કઈં જમીર જેવું બચ્યું છે ખરાં ?

તેમણે લખ્યું છે કે જેનામાં સત્તા-સંપત્તિની લાલચ ન હોય, જેને છેલ્લામાં છેલ્લામાં માણસનું કામ છેલ્લા શ્વાસ સુધી કરવું હોય, જેનામાં બંધારણની વિચારધારા હોય એવા લોકસેવકોને આપણે જ શોધીને પંચાયતથી સંસદ સુધી ચૂંટીને મોકલીશું નહીં ત્યાં સુધી આ સ્થિતિ બની રહેવાની છે. આ સંજોગોમાં આપણે, ગુજરાતની સાડા 6 કરોડ જનતાએ સંકલ્પ કરવાનો છે કે હવે આ ધંધો નહીં થવા દઈએ.

તેમણે લખ્યું છે કે રાજ્યસભાની ચૂંટણી દરમિયાન રૂપિયાના બંડલો ખાતર પ્રજા દ્રોહ કરી, પોતાના મતવિસ્તારના લાખો નાગરિકો સાથે વિશ્વાસઘાત અને ઠગાઈ કરી જે લોકો વેચાઈ ગયા એવા લોકોને ગુજરાતની સમજદાર જનતા કાયમ માટે જાકારો આપી દે તેમજ  લોકશાહીના આવા ગદ્દારોનું જાહેરજીવન સદા સદા માટે સમાપ્ત કરી નાંખે એવી ગુજરાતની જનતાને અપીલ કરું છું. એ અનિવાર્ય બન્યું છે કે જનતા નિર્ણય લે કે અમે આવો વેચાયેલો માલ પરત લેવાના નથી.

તેમણે લખ્યું છે કે આપણે ગુજરાતી તરીકે ભૂલીએ નહીં કે આ રવિ શંકર મહારાજ, ઇન્દુલાલ યાજ્ઞિક અને સરદાર પટેલનું ગુજરાત છે. પોતાને વેચીને નવરા થયેલાં આ ધારાસભ્યોએ ગુજરાતની અસ્મિતા અને ગુજરાતના ગૌરવને કલંકિત કર્યા છે.

તેમણે લખ્યું છે કે મતવિસ્તારમાં ફાળવવાની થતી દોઢ કરોડની ગ્રાન્ટમાંથી દર વરસે 20 ટકા ટકાવારી ખાવી, ટીડીઓ-ડીડીઓ-કલેકટર-પોલીસ-બુટલેગરો પાસેથી હપ્તા ખાવા, જમીનના સોદા પાડવા, રીઅલ એસ્ટેટની સાઈટોમાં ભાગીદારી, ખાણ-ખનીજની લીઝો લેવી અને અપાવવી અને એવી અનેક ગેરકાયદે કમાણીઓ છતાં આ લોકોનું પેટ ભરાયું નહીં હોય એટલે જ રાજ્યસભાની ચૂંટણી ટાણે આ ધંધા માંડ્યા છે.

અંતમાં તેમણે કહ્યું કે  ભાઈઓ-બહેનો, હું એક ધારાસભ્ય તરીકે આપ સૌને ફરી ફરીને અપીલ કરું છું કે વેચાયેલાં આ ધારાસભ્યો અને એમને ખરીદનાર સત્તા પક્ષના ગાલ પર એવો તમાચો મારો કે એના નિશાન જોઈ બીજા ધારાસભ્યોનું ઈમાન ડગવાનું નામ ન લે!