શેરબજારમાં નીચે તરફની ગતિ યથાવત : સોમવારે સેન્સેક્સ શરૂઆતમાં 2000 પોઇન્ટથી વધુ તૂટ્યો

અમેરિકન ફેડરલ રિઝર્વે વ્યાજદરમાં ઘટાડો કર્યા પછી વૈશ્વિક અર્થતંત્ર પર કોરોના વાયરસથી ફેલાયેલા રોગચાળાની અસરની ચિંતા ડોમેસ્ટિક શેરબજાર પર પ્રેશર વધારી દીધું છે. આ કારણે જ સોમવારે શરૂઆતના કામકાજમાં જ શેરબજાર સેન્સેક્સમાં 2000થી વધુ પોઇન્ટનું ગાબડું પડ્યું હતું જ્યારે નિફ્ટી પણ શરૂઆતના કામકાજમાં 9400 પોઇન્ટના લેવલથી નીચે ઉતરી ગયો હતો. શરૂઆતના કામકાજમાં રૂપિયો પણ 41 પૈસા તૂટીને 74.16 પ્રતિ ડોલરના લેવલે આવી ગયો હતો. બીએસઇના 30 શેરની સ્ક્રિપ્ટવાળા સૂચકાંક સેન્સેક્સમાં ગત સપ્તાહની ઉથલપાથલ ચાલુ જ રહી હતી અને તે સોમવારે સવારે 2004.20 પોઇન્ટ મતલબ કે 5.88 પોઇન્ટ તૂટીને 32,099.28 પોઇન્ટ પર પહોંચી ગયો હતો.

સોમવારે શેર માર્કેટ ઓપન થતા જ સેન્સેક્સ 1000 પોઈન્ટના ગાબડા સાથે ખુલ્યો હતો. જે જોતજોતામાં 1800થી વધારે પોઇન્ટ નીચે ખસકી ગયો. સેન્સેક્સ શરૂઆતમાં 1586 પોઈન્ટથી ઘટીને 32,516ની સપાટીએ આવી ગયો હતો. આજ રીતે નિફટી 436 પોઈન્ટ ઘટીને 9,587ની સપાટી પર આવી ગયો હતો. કોરોનાને જોતા અમેરિકન ફેડરલ બેન્કે વ્યાજદરમાં ઘટાડો કરીને શૂન્ય કરી દીધો છે. તેની અસર બજાર ઉપર જોવા મળી છે. દુનિયાભરમાં શેર બજાર લાલ થઈ ગયા છે. એશિયાઈ શેર બજારોમાં આજે સવારે 7 ટકાનો ઘટાડો જોવા મળ્યો. ન્યુયોર્ક ફ્યુચર સ્ટોક્સ 4 ટકા નીચે કારોબાર કરી રહ્યો છે.

સેન્સેક્સમાં ઈન્ડસઈન્ડ બેન્ક, એચડીએફસી, આઈસીઆઈસીઆઈ બેંક અને એક્સિસ બેંકના શેર્સમાં મોટો ઘટાડો જોવા મળ્યો. જ્યારે નિફ્ટીમાં જેએસડબ્લ્યુ સ્ટીલ, વેદાંત, હિન્દાલ્કો વગેરે નીચે પટકાયેલા શેરમાં ટોચ પર છે. બીજી બાજુ, નવજીવન મળવાના અહેવાલ સાથે યસ બેન્કના શેરમાં 30% સુધીની તેજી જોવા મળી છે. શેરબજારમાં શુક્રવારે ખૂબ વધ-ઘટનું માહોલ જોવા મળ્યું હતું. બોમ્બે સ્ટોક એક્સચેન્જમાં સેન્સેક્સ ખુલતા જ 2,534 પોઈન્ટનો કડાકો જોવા મળ્યો હતો. ઓપનિંગની 12 મિનિટમાં જ લોઅર સર્કિટ વાગવાના કારણે ટ્રેડિંગ રોકવું પડ્યું હતું.

ફરી વખત ટ્રેડિંગ શરૂ થતાં સેન્સેકસ 3600 પોઈન્ટ સુધી ઘટ્યો હતો. ત્યારપછી યુએસ ફ્યુચર્સ અને સેબીના આશ્વાસન પછી બજારમાં રિકવરી શરૂ થઈ હતી. આટલા મોટા ઘટાડા પછી સેન્સેક્સમાં 1700 પોઈન્ટની તેજી જોવા મળી હતી. આ સેન્સેક્સના ઈતિહાસમાં સૌથી મોટી ઈન્ટ્રાડે રિકવરી છે. શુક્રવારે આખા દિવસના વેપારમાં કુલ 5400 પોઈન્ટનો ઉતાર-ચઢાવ જોવા મળ્યો હતો. આ પણ એક દિવસમાં બજારની સૌથી મોટી વધ-ઘટ માનવામાં આવે છે. વેપારના અંતમાં સેન્સેક્સ 1325 પોઈન્ટ વધીને 34,103 પોઈન્ટની સપાટીએ બંધ થયો હતો.