ઇઝરાયલી વૈજ્ઞાનિકોએ કોરોનાની વેકસીન બનાવી લીધી : ટૂંકમાં જાહેરાત કરવામાં આવે તેવી સંભાવના

ઇઝરાયલી મીડિયા દ્વારા એવો દાવો કરવામાં આવ્યો છે કે ઈઝરાયેલના વૈજ્ઞાનિકોએ કોરોના વાયરસની રસી બનાવી લીધી છે અને ટૂંકમાં જ આ સફળતા મળી હોવાની જાહેરાત કરે તેવી શક્યતા છે. ઈઝરાયેલના મીડિયાના જણાવ્યા અનુસાર, દેશની ઈન્સ્ટિટ્યૂટ ફોર બાયોલોજીકલ રિસર્ચના વૈજ્ઞાનિકો કોરોના વાયરસ સામે રક્ષણ આપે તેવી રસી બનાવવાની ખૂબ નજીક પહોંચી ગયા છે. ઈઝરાયેલની આ સંસ્થા પીએમ ઓફિસના તાબા હેઠળ આવે છે. તેના વૈજ્ઞાનિકોએ કોરોના વાયરસના બંધારણને વિગતે સમજી લીધું હોવાનું માનવામાં આવી રહ્યું છે. આ વૈજ્ઞાનિકો કોરોના વાયરસનો શિકાર બનેલા લોકોને સાજા કરી શકે તેવી રસી બનાવવાની તૈયારીમાં હોવાના દાવા કરાઈ હ્યા છે.

મીડિયા રિપોર્ટ્સ અનુસાર, રસી બનાવવાનું કામ હજુ પ્રોસેસમાં છે અને તેને બજારમાં મૂકતા પહેલા તેના અનેક ટેસ્ટ તેમજ પ્રયોગો કરવા જરુરી છે. જેમાં મહિનાઓ લાગી શકે છે. આ પ્રયોગો બાદ જ રસી ખરેખર કોરોનાને મટાડી શકે તેમ છે કે નહીં તેમજ તેની કોઈ આડઅસર થાય છે કે નહીં તે જાણી શકાશે. જોકે, ઈઝરાયેલના સંરક્ષણ મંત્રાલયે આ ડેવલપમેન્ટ પર કોઈ પ્રતિક્રિયા આપવાનો ઈનકાર કરી દીધો હતો.

ઈઝરાયેલની બાયોલોજિકલ ઈન્સ્ટિટ્યૂટ વિશ્વની ઘણી નામાંકીત સંસ્થા છે. તેના 50 વૈજ્ઞાનિકોની ટીમ હાલ કોરોના વાયરસની રસી બનાવવામાં કામે લાગેલી છે. ઈઝરાયેલના પીએમે સંસ્થાને 1 ફેબ્રુઆરીએ કોરોના વાયરસની રસી બનાવવા માટે જણાવ્યું હતું. કોઈપણ રોગની રસીને દર્દીને આપતા પહેલા તેની પ્રાણીઓ પર ટ્રાયલ લેવાય છે, ત્યારબાદ તેની ક્લિનિકલ ટ્રાયલ શરુ થાય છે અને તેના સંતોષકારક પરિણામો બાદ તે દર્દીને આપી શકાય છે. કોરોનાની રસી બનાવવા માટે આ સંસ્થામાં ત્રણ સપ્તાહ પહેલા ઈઠાલી, જાપાન અને અન્ય દેશોમાંથી કોરોનાના સેમ્પલ મગાવાયા હતા. માઈનસ 80 ડિગ્રી તાપમાનમાં આ સેમ્પલ ખાસ કુરિયર દ્વારા ઈઝરાયેલ પહોંચાડવામાં આવ્યા હતા. એક્સપર્ટ્સનું માનીએ તો આ રસી બનાવવામાં કેટલાક મહિનાથી લઈને વર્ષથી દોઢ વર્ષ સુધીનો સમય લાગી શકે છે.