મહિલા ટી-20 વર્લ્ડકપ ફાઇનલ : ઓસ્ટ્રેલિયાએ મુક્યો 184 રનનો લક્ષ્યાંક, 3 ઓવરમાં ભારતનો સ્કોર 18/2

મેલબોર્નના ઐતિહાસિક મેદાનમાં મહિલા ટી20 વર્લ્ડકપની ફાઈનલ મેચમાં ઓસ્ટ્રેલિયાની ટીમે પહેલા બેટિંગ કરતા 20 ઓવરમાં 4 વિકેટ ગુમાવીને 184 રનનો પહાડ જેવો સ્કોર બનાવ્યો. ઓસ્ટ્રેલિયાની ઓપનર એલિસા હેલીએ 39 બોલમાં 75 રનની વિસ્ફોટક ઈનિંગ્સ રમી હતી. જ્યારે બેથ મૂનીએ 54 બોલમાં 78 રનની ઈનિંગ્સ રમી. ઓસ્ટ્રેલિયાની ટીમે મેચમાં ટોસ જીતને પહેલા બેટિંગનો નિર્ણય કર્યો હતો. ભારતે શેફાલી વર્મા અને જેમિમા રોડ્રિગ્સની વિકેટ ગુમાવી છે.

મહિલા ટી-20 વર્લ્ડકપની ફાઈનલ મેચમાં ઓસ્ટ્રેલિયાના ઓપનર્સે પહેલી ઓવરથી જ વિસ્ફોટક બેટિંગ શરૂ કરી દીધી હતી. બંને ઓપનર્સે મળીને પહેલી વિકેટ માટે 11.4 ઓવરમાં 115 રનની પાર્ટનરશીપ કરી હતી. એલિસાએ પોતાની 75 રનની ઈનિંગ્સમાં 7 ચોગ્ગા અને 5 છગ્ગા ફટકાર્યા હતા.

મેચમાં ભારતીય મહિલા બોલર્સનું પ્રદર્શન ખૂબ નિરાશાજનક રહ્યું હતું. ભારતીય બોલર શીખા પાંડેએ 4 ઓવરમાં 52 રન આપ્યા હતા. જ્યારે દીપ્તી શર્માએ 4 ઓવરમાં 2 વિકેટ લઈને 38 રન આપ્યા. ભારતની સ્ટાર સ્પિનર પૂનમ યાદવ પણ મેચમાં 4 ઓવરમાં 30 રન આપીને 1 વિકેટ જ મેળવી શકી.

ભારતીય ટીમે ફાઈનલ સુધીની સફરમાં એક પણ મેચ ગુમાવી નથી, જ્યારે ઓસ્ટ્રેલિયાએ ભારત સામે એકમાત્ર મેચ ગુમાવી હતી. ભારત માટે 16 વર્ષની શેફાલીએ ટૂર્નામેન્ટમાં 5 મેચોમાં 163 રન કર્યા હતા. જ્યારે સ્પીનર પૂનમ યાદવે 5 મેચમાં કુલ 10 વિકેટ ઝડપી છે. આ પહેલા ઈંગ્લેન્ડ વિરુદ્ધ સેમીફાઈનલમાં વરસાદ પડવાથી મેચ રદ થઈ ગઈ. એવામાં ગ્રુપ-એમાં ટોચના ક્રમે રહેલી ભારતીય ટીમ ફાઈનલમાં પહોંચી હતી.