જીવતા કોરોનાવાયરસનો ફોટો લેવામાં વૈજ્ઞાનિકોને મળી સફળતા, ટૂંકમાં ઇલાજ મળવાની આશા

ચીનના વુહાન પ્રાંતમાંથી હાલ વિશ્વભરમાં ફેલાયેલો ઘાતક કોરોના વાયરસ આમ તો આખી દુનિયા માટે નવો છે. એટલે જ અત્યાર સુધી ખબર નહોતી કે તેની સંરચના કેવી છે, દેખાય છે કેવો. દુનિયાભરના વૈજ્ઞાનિકો આ વાયરસ પર રિસર્ચ કરી રહ્યા છે. ત્યારે મહત્વની બાબત એ છે કે, વૈજ્ઞાનિકોની એક ટીમે કોરોના વાયરસની અસલી સંરચનાને ઓળખવામાં સફળતા મળી છે. એટલું જ નહીં જ્યારે આ વાયરસ કોઈ કોશિકાને સંક્રમિત કરે છે ત્યારે કોશિકાની સ્થિતિ શું થાય છે તેની તસવીર લેવામાં વૈજ્ઞાનિકો સફળ થયા છે.

આ સફળતા અત્યારે ઘણી મહત્વની કહી શકાય કારણકે કોરોના વાયરસની ઓળખ, તેનું વિશ્લેષણ અને જરૂરી ક્લિનિકલ રિસર્ચ કરવામાં સરળતા રહેશે. મતલબ કે, હવે આ જીવલેણ વાયરસને નાથવાનો ઉપાય પણ મળી જશે. એક રિપોર્ટ પ્રમાણે, દક્ષિણ ચીનના શેનજેનમાં રિસર્ચરોની એક ટીમે પહેલી એવી તસવીર જારી કરી છે જે દર્શાવે છે કે કોરોના વાયરસ અસલમાં કેવો દેખાય છે.

આ તસવીર ફ્રોઝન ઈલેક્ટ્રોન માઈક્રોસોપ એનાલિસિસ ટેક્નોલોજીની મદદથી લેવામાં આવી છે. આ ટેક્નિકથી વાયરસને નિષ્ક્રિય કર્યા બાદ તેની તસવીર લેવામાં આવી છે. આ ટેક્નિક દ્વારા વાયરસના જૈવિક નમૂનાને સુરક્ષિત રાખવામાં આવ્યો જેથી ખબર પડી કે વાયરસ જીવિત હતો ત્યારે કેવો હતો અને કેવી સ્થિતિમાં હતો. આ સૌથી વિશ્વસનીય પરિણામ છે.

રિસર્ચ ટીમના સભ્ય અને અસોસિએટ પ્રોફેસર લિઉ ચુઆંગે જણાવ્યું, “વાયરસની જે સંરચનાને અમે જોઈ છે તે વાયરસ જીવતો હોય ત્યારે જેવી હોય તેવી જ છે.” આ સાથે રિસર્ચરોની ટીમ વાયરસથી સંક્રમિત થયેલી કોશિકાની સ્થિતિ પણ તસવીરોમાં કેદ કરવામાં સફળ રહી છે. શેનજેન નેશનલ ક્લિનિકલ મેડિકલ રિસર્ચ સેન્ટર અને સદર્ન યુનિવર્સિટી ઓફ સાયન્સ એન્ડ ટેક્નોલોજીની સંયુક્ત ટીમે આ સફળતા હાંસલ કરી છે. વાયરસની ઓળખ, તેનું વિશ્લેષણ અને જરૂરી ક્લિનિકલ રિસર્ચનો માર્ગ મોકળો થયો છે.