કુપોષણમુક્ત ગુજરાત મહાઅભિયાનના દાવાની પોલંપોલ : રાજ્યમાં 3.83 લાખ કુપોષિત બાળકો

સમગ્ર ગુજરાત રાજ્યને કુપોષણ મુક્ત કરવાના મહાઅભિયાનના દાવાની પોલંપોલ સરકારના આંકડાઓએ જ જાહેર કરી દીધી છે અને રાજ્યમાં કુપોષિત બાળકોની સંખ્યા 9 જુલાઈ 2019થી 6 મહિનાની અંદર 2,41,698 જેટલી વધી ગઈ છે. ગુરુવારે ગુજરાત સરકારે વિધાનસભામાં જણાવ્યું કે રાજ્યમાં 3,83,840 કુપોષિત બાળકો છે. વિપક્ષ નેતા પરેશ ધાનાણીએ કહ્યું કે, તેમના ધારાસભ્યોએ પૂછેલા જુદા જુદા સવાલના જવાબમાં આ 3.83 લાખ કુપોષિત બાળકોનો આંકડો સામે આવ્યો છે. વિધાનસભામાં 9 જુલાઈ 2019માં આવા જ એક પ્રશ્નના જવાબમાં રાજ્ય સરકારે જણાવ્યું હતું કે, રાજ્યમાં 1.42 લાખ બાળકો કુપોષણથી પીડિત છે. પરેશ ધાનાણીએ કહ્યું, જો રાજ્ય સરકારના નિવેદનની સરખામણી કરવામાં આવે તો 6 મહિનાની અંદર રાજ્યમાં 2.42 લાખ કુપોષિત બાળકો વધ્યા છે.

સામાજિક-આર્થિક સર્વે 2019-20માં મુજબ, 8 જુલાઈ 2019થી કુપોષણમુક્ત ગુજરાત મહાઅભિયાન (ફેઝ 5) શરૂ કરાયું હતું. આ પ્રોગ્રામ હેઠળ ફિલ્ડ ઓફિસર્સ દ્વારા 55.64 લાખ બાળકોનું ચેકઅપ થવાનું હતું. 4 ફેબ્રુઆરી 2020 સુધીમાં 37.21 લાખ બાળકોનું ચેકઅપ થયું હતું જેમાંથી 2.97 લાખ બાળકો કુપોષિત હતા. ધાનાણીએ કહ્યું કે, આદિવાસી વિસ્તારમાં સરકાર આ મુદ્દાએ ધ્યાન દોરવામાં નિષ્ફળ ગઈ છે. લોકો ભૂખના કારણે મરી રહ્યા છે. તેમણે કહ્યું કે, રાજ્યમાં જન્મનાર દરેક ત્રીજું બાળક પોતાના પહેલા જન્મદિવસ પહેલા મૃત્યુ પામે છે.

અન્ન સુરક્ષા અધિકારી અભિયાનના ડાયરેક્ટર નીતા હાર્દિકારે કહ્યું, એવું લાગી રહ્યું છે કે સરકાર સાચા આંકડા છુપાવી રહી હતી. નેશનલ સર્વેથી ગુજરાતમાં કુપોષણનો વધારે આંકડો સામે આવ્યો છે. જેથી સ્પષ્ટ થાય છે કે સરકાર આંકડા છુપાવી રહી હતી. તેમણે કહ્યું, સરકાર દાવો કરી રહી છે કે સ્થળાંતરીત વસ્તીના કારણે કુપોષિત બાળકોની સંખ્યા વધારે છે. નીતા હાર્દિકારે સવાલ કર્યો કે, તો એનો મતલબ એવો છે કે માત્ર આદિવાસી વિસ્તારમાં જ સ્થળાંતર થઈ રહ્યું છે? અન્ય એક સવાલના જવાબમાં દિયોદરના ધારાસભ્ય શિવભાઈ ભુરિયાએ કહ્યું, સરકારે દાવો કર્યો છે કે સરકાર 6 મહિનાથી 72 મહિનાના પ્રત્યેક કુપોષિત બાળકની પાછળ 8 રૂપિયાનો ખર્ચ કર્યો છે. જ્યારે પત્યેક ગંભીર કુપોષિત બાળકની પાછળ 12 રૂપિયાનો ખર્ચ કરાયો છે.