દિલ્હી હિંસાઃ જ્યારે અંગ્રેજી અખબારના ફોટોગ્રાફરને પૂછાયું ‘ હિન્દુ છો કે મુસલમાન?’

સીએએના સમર્થનમાં અને વિરોધમાં ઉત્તરપૂર્વ દિલ્હીમાં ભડકેલી હિંસાએ સૌ કોઈને હચમચાવી દીધા છે. સ્થિતિ એટલી વણસી ગઈ છે કે ધર્મ પૂછીને મારમારી અને હિંસાને અંજામ આપવામાં આવી રહ્યો છે. અંગ્રેજી અખબારના ફોટો જર્નાલિસ્ટ સોમવારે લગભગ સવા બાર વાગ્યે મોજપુર મેટ્રો સ્ટેશન પર પહોંચ્યા તો હિન્દુ સેનાના એક સભ્યએ અચાનક તેમની પાસે આવીને તેમના માથા પર તિલક કરી દીધું. તેણે ફોટો પત્રકારને કહ્યું કે તેમનું કામ સરળ થઈ જશે. તેણે કહ્યું, “તમે હિન્દુ છો, ભાઈ. તેનાથી (તિલકથી) શું નુકસાન છે?”

લગભગ 15 મિનિટ પછી આ વિસ્તારમાં બે ગ્રુપ એક-બીજા તરફ પત્થરબાજી કરવા લાગ્યા. ‘મોદી-મોદી’ના નારા વચ્ચે આકાશમાં ધુમાડા દેખાવા લાગ્યા. ફોટો જર્નાલિસ્ટ જેવા આગ લાગેલી બિલ્ડિંગ તરફ આગળ વધી રહ્યા હતા તો કેટલાક લોકોએ તેમને શિવ મંદિર પાસે રોક્યા. જ્યારે ફોટો જર્નાલિસ્ટે કહ્યું કે ફોટો લેવા બિલ્ડિંગ તરફ જઈ રહ્યા છે તો તેમને રોકી દેવાયા. તેમણે ફોટો જર્નાલિસ્ટને કહ્યું, “ભાઈ, તમે પણ હિન્દુ છો. કેમ જઈ રહ્યા છો? આજે હિન્દુ જાગી ગયો છે.”

ફોટો જર્નાલિસ્ટ થોડીવાર પછી બેરિકેડ તરફ ચાલ્યા ગયા. તેમણે જેવા ફોટો લેવાનું શરુ કર્યું, હાથમાં ડંડા અને સળિયા લઈને તેમને કેટલાક લોકોએ ઘેરી લીધા. તેમની પાસેથી કેમેરા છીનવવાની કોશિશ કરી, આ જોઈને ટાઈમ્સ ઓફ ઈન્ડિયાના રિપોર્ટર સાક્ષી ચાંદ વચ્ચે પડ્યા અને બૂમો પાડવા લાગ્યા. આ પછી તેમને છોડી દીધા. થોડીવાર તેમને અહેસાસ થયો કે, કેટલાક લોકો તેમનો પીછો કરી રહ્યા છે. એક યુવકે કહ્યું, “ભાઈ, તુ વધારે ઉછળી રહ્યો છે. તુ હિન્દુ છે કે મુસલમાન?” તેમણે ત્યાં સુધી કહ્યું કે ધર્મ જાણવા માટે તેઓ તેમનું પેન્ટ ઉતારીને પ્રાઈવેટ પાર્ટ ચેક કરશે. પછી તેમણે હાથ જોડીને કહ્યું કે તેઓ એક ફોટોગ્રાફર છે તો લોકોએ તેમને છોડી દીધા.

આ પછી તેઓ ત્યાંથી નીકળ્યા અને ઓફિસની ગાડી શોધવા લાગ્યા, પણ તે મળી નહીં. પછી જાફરાબાદ તરફ થોડું પગપાળા ચાલ્યા. એક રિક્ષા મળી. ડ્રાઈવર તેમને આઈટીઓ છોડવા માટે તૈયાર થયો. ફોટો જર્નાલિસ્ટને લાગ્યું કે ઓટો ડ્રાઈવરનું નામ તેમને તકલીફમાં મૂકી શકે છે. કિસ્મત જુઓ, થોડા અંતર પછી ચાર જણાએ તેમને ઘેરી લીધા. તેમણે બન્નેને કોલર પકડીને બહાર ઉતારવાની કોશિશ કરી. જ્યારે ફોટો જર્નાલિસ્ટે જણાવ્યું કે તે પત્રકાર છે અને રિક્ષા ડ્રાઈવર નિર્દોષ છે તો તેમણે જવાની મંજૂરી આપી. જ્યારે ફોટો જર્નાલિસ્ટ આઈટીઓ પહોંચ્યા તો તેમણે જોયું કે રિક્ષાનો ડ્રાઈવર ઘણો જ ડરેલો છે. તેમણે ઓટો ડ્રાઈવરથી વિદાય લેતી વખતે કહ્યું- “જીવનમાં કોઈએ મને આટલી ખરાબ રીતે ક્યારેય મારો ધર્મ નહોતો પૂછ્યો.”