અમેરિકા અને ભારત વચ્ચે ત્રણ અબજ ડોલરના સંરક્ષણ સોદા સહિત ત્રણ મોટા કરાર

ભારતની બે દિવસીય મુલાકાતે આવેલા અમેરિકન રાષ્ટ્રપતિ ડોનાલ્ડ ટ્રમ્પ અને પીએમ મોદી વચ્ચે મંગળવારે હૈદરાબાદ હાઉસમાં લાંબી બેઠક યોજાઈ હતી. બેઠક બાદ મોદી અને ટ્રમ્પે સંયુક્ત પ્રેસ કોન્ફરન્સ કરી હતી. જેમાં પીએમ મોદીએ જણાવ્યું હતું કે ભારત અને અમેરિકા વચ્ચે ડિફેન્સ, ટેક્નોલોજી તેમજ ટ્રેડ રિલેશન ખાસ્સા મજબૂત છે. બંને દેશના ડિફેન્સ મેન્યુફેક્ચરર એકબીજાની સપ્લાય ચેનના ભાગીદાર બની રહ્યા છે. બંને દેશો વચ્ચે ત્રણ સમજૂતી પર હસ્તાક્ષર કરાયા હતા. જેમાં સંરક્ષણ સોદા ઉપરાંત એક કરાર ઉર્જા ક્ષેત્ર સાથે પણ સંબંધિત છે.

ટ્રમ્પના આગમન પહેલા બહુચર્ચિત બનેલી ટ્રેડ ડીલ અંગે મોદીએ જણાવ્યું હતું કે, બંને દેશના વાણિજ્ય મંત્રી વચ્ચે હકારાત્મક ચર્ચા થઈ છે. બંને દેશોએ નક્કી કર્યું છે કે આ ચર્ચાને કાયદાકીય રુપ આપવા માટે તેઓ કામ કરશે. ભારત અને અમેરિકા એક મોટી ડીલ માટે વાટાઘાટ કરી રહ્યા હોવાનું પણ મોદીએ કહ્યું હતું. સંયુક્ત પત્રકાર પરિષદ સંબોધતા પીએમ મોદીએ જણાવ્યું હતું કે, આજે તેમના અને ટ્રમ્પ વચ્ચે સંરક્ષણ, સુરક્ષા, ઊર્જા તેમજ વેપાર અંગે ચર્ચા થઈ છે. ભારત અને અમેરિકા વચ્ચેની ભાગીદારીમાં સંરક્ષણ ગઠબંધન ખૂબ જ મહત્વપૂર્ણ છે. બંને દેશે આતંકવાદને ટેકો આપનારા તેમજ તેને ફેલાવનારા દેશો સામે ભારત અને અમેરિકા ભેગા મળીને કાર્યવાહી કરશે.

ડોનાલ્ડ ટ્રમ્પે આ પ્રેસ કોન્ફરન્સમાં જણાવ્યું હતું કે, તેમનો ભારતનો પ્રવાસ ખૂબ જ ફળદાયી રહ્યો છે. તેમણે ગુજરાતમાં થયેલા પોતાના સ્વાગત, સાબરમતી આશ્રમ તેમજ તાજ મહાલનો ઉલ્લેખ કર્યો હતો. બંને દેશો વચ્ચે 3 બિલિયન ડોલરનો સંરક્ષણ સોદો થયો છે તેમ જણાવતા ટ્રમ્પે કહ્યું હતું કે અમેરિકા ભારતને અપાચી, એમએચ 60, રોમિયો હેલિકોપ્ટર્સ આપશે. ભારત સાથે 5G ટેક્નોલોજી પર પણ સોદો થયો હોવાનું ટ્રમ્પે જણાવ્યું હતું. મોદી અને પોતાની વચ્ચે બંને દેશ વચ્ચે દ્વિપક્ષીય વેપાર વધારવા પણ ચર્ચા થઈ હોવાનું ટ્રમ્પે જણાવ્યું હતું. તેમણે કહ્યું હતું કે, ઊર્જા ક્ષેત્રે પણ બંને દેશો વચ્ચે ડીલ થઈ છે.