ગુજરાત સહિત ભાજપ શાસિત રાજ્યોમાં સરકાર અને સંગઠનમાં ફેરફારની આંધી ફૂંકાશે

એક જ વર્ષમાં ભાજપે પાંચ મોટા રાજ્યો ગુમાવતા મુખ્યમંત્રીઓની કાર્યશૈલી સામે સવાલો ઉભા થઈ રહ્યા છે ત્યારે ભાજપ હાઈકમાન્ડ દ્વારા ભાજપ શાસિત રાજ્યોના મુખ્યમંત્રીઓની કામગીરીની સમીક્ષા કરવામાં આવશે. આમાં સ્પષ્ટપણે માનવામાં આવે છે કે જે રાજ્યોની કામગીરીથી ભાજપનું ઉચ્ચ નેતૃત્વ સંતુષ્ટ નહીં હશે ત્યાં સરકારથી લઈને સંગઠન સુધી મોટા ફેરફારો કરવામાં આવી શકે છે.

પાછલા એક વર્ષમાં ભાજપનો ચૂંટણીમાં દેખાવ ખરાબ રહ્યો છે. મધ્યપ્રદેશ, રાજસ્થાન, છત્તીસગઢ, મહારાષ્ટ્ર અને હવે ઝારખંડમાં ભાજપની પોતાની સરકારો ગઈ છે. એક સાથે આટલા બધા રાજ્યો હાથમાંથી સરકી જતાં ભાજપના શિર્ષ નેતૃત્વને ચિંતા થાય એ સ્વભાવિક છે.

જ્યાં સુધી ગુજરાતને લાગે-વળગે છે ત્યાં સુધી ગુજરાતમાં વિધાનસભાની પેટાચૂંટણીના પરિણામોથી હાઈકમાન્ડ ખુશ નથી. આ ઉપરાંત 2020માં ગુજરાતની તમામ મહાનગરપાલિકાની ચૂંટણીઓ આવી રહી છે. ગુજરાત સરકાર દ્વારા અનેક જાહેરાતો કરવામાં આવી રહી છે પરંતુ સ્થિતિ એ છે કે રોજ કોઈને કોઈ આંદોલનની શરૂઆત થઈ જાય છે. જોકે, ગુજરાત વિધાનસભામાં 150 પ્લસ સીટનો દાવો કરનાર

99 સીટ પર આવી પહોંચ્યો હતો અને પેટાચૂંટણીમાં જીતીને 103 બેઠકો સુધી પહોંચ્યું છે. આવી સ્થિતિમાં રૂપાણી સરકાર સામે સવાલો ઉભા થઈ રહ્યા છે.

દેશની વાત કરીએ હાલ ભાજપ પાસે ઉત્તરપ્રદેશ, કર્ણાટક, આસામ, ગુજરાત, ઉત્તરાખંડ, હરિયાણા, ગોવા, હિમાચલ પ્રદેશ, અરુણાચલ પ્રદેશ, મણિપુર અને ત્રિપુરામાં સરકાર છે. જ્યારે બિહારમાં જેડીયુ સાથે સરકાર છે અને પૂર્વોત્તરના રાજ્યોમાં પ્રાદેશિક પાર્ટીઓ સાથેની સરકારો છે.

ભાજપ હાઈકમાન્ડની નજર ઉત્તરપ્રદેશ, ઉત્તરાખંડ, હરિયાણા, હિમાચલ પ્રદેશ, ગુજરાત અને ત્રિપુરા પર છે. ભાજપના મોટા ગજાના નેતાનું કહેવું છે કે કોઈ એક જ નેતા પર પાર્ટીને છોડીને દેવી એનાથી નુકશાન થઈ રહ્યું છે. જેથી કરીને આ તમામ રાજ્યોમાં સરકારથી લઈ સંગઠનમાં મોટા પ્રમાણમાં ફેરફાર કરવામાં આવે તેવી શક્યતા છે. સતત હારના કારણે હવે સાથી પક્ષો પણ ભાજપ તરફ આંગળીઓ ચિંધતા થઈ ગયા છે. નીતિશ કુમારે તો એનઆરસીના મુદ્દે કેન્દ્ર સરકારે વિરુદ્વ નિવેદન પણ આપી દીધું છે, જેના કારણે ભાજપ અસહજ સ્થિતિમાં મૂકાઈ જવા પામ્યું છે.