કેન્દ્ર સરકારના કર્મચારીઓને વહેલી દિવાળી, મોંઘવારી ભથ્થું 12 ટકાથી વધારી 17 ટકા કરાયું

દિવાળી પહેલા કેન્દ્ર સરકારે સરકારી કર્મચારીઓને પગારવધારાની ભેટ આપી છે. કેન્દ્રીય કર્મચારીઓના મોંઘવારી ભથ્થા એટલે કે ડિયરનેસ એલાઉન્સ (DA)માં 5 ટકાનો વધારો કરાયો છે. અગાઉ DA 12 ટકા જેટલું હતું જે વધારીને 17 ટકા કરાયું છે. કેન્દ્રીય મંત્રી પ્રકાશ જાવડેકરે તેની જાહેરાત કરી હતી.

DA 12 ટકાથી 17 ટકા વધાર્યું તેનો લાભ 50 લાખ જેટલા સરકારી કર્મચારીઓ અને 62 લાખ જેટલા પેન્શનર્સને મળશે. તેને કારણે સરકારી તિજોરી પર 16,000 કરોડનું ભારણ આવશે. આ વધારો જુલાઈ મહિનાથી લાગુ પડશે. એટલે કે કર્મચારીઓને ત્રણ મહિનાનું એરિયર્સ પણ મળશે.

જાવડેકરે બીજી એક જાહેરાત કરતા જણાવ્યું કે સરકારે આશા કાર્યકર્તાઓનું વેતન રૂ.1000થી વધારી રૂ. 2000 કર્યું છે. આ ઉપરાંત પ્રધાન મંત્રી કિસાન સમ્માન નિધિના લાભ મેળવવા માટે આધાર ફરજિયાત બનાવવાની મુદ્દત 30 નવેમ્બર સુધી લંબાવવામાં આવી છે.