કારના બોનેટવાળો ફેસબૂકનો ફોટો આખરી ફોટો બની રહ્યો, કેનેડાનો રસ્તો ભરૂચના ત્રણ યુવાનોને ભરખી ગયો

ભરૂચ જિલ્લાના ત્રણ આશાસ્પદ યુવાનોનો કેનેડામાં કાર અકસ્માતમાં મોત નિપજ્યા હોવાના સમાચાર મળતા પરિવારજનો સહિત ગામમાં શોકનું મોજું ફરી વળ્યું છે. ભરૂચ જિલ્લાના જંબૂસર, અંકલેશ્વર અને ભરૂચના ત્રણેય યુવાનો કેનેડામાં અભ્યાસ અર્થે ગયા હતા અને તેમના મોતના સમાચાર ગમગીની સાથે આક્રંદ કરાવી રહ્યા છે.

અકસ્માતમાં મોતને ભેટેલા એક યુવાનની ઓળખ થઈ છે જ્યારે બાકીના બે યુવાનોની ઓળખ બાકી છે. જંબૂસરની રાણા સ્ટ્રીટમાં હેતો અને કેનેડામાં અભ્યાસ માટે ગયેલો જેનિશ રાણાએ જુલાઈ મહિનામાં ફેસબૂક પર કારના બોનેટ પર બેઠો હોવાનો ફોટો પોસ્ટ કર્યો હતો. આ ફોટો તેનો આખરી ફોટો બની રહ્યો હતો.

ભરૂચમાંથી જાણવા મળ્યા મુજબ કારને અકસ્માત નડતા સ્થળ પર જ બે યુવાનો મોતને ભેટયા હતા જ્યારે એક યુવાન ગંભીર રીતે ઈજા પામતા તેને સારવાર માટે દાખલ કરવામાં આવ્યો હતો. જ્યાં તેનું પણ સારવાર દરમિયાન મોત નિપજ્યું હોવાનું જાણવા મળી રહ્યું છે.

જાણવા મળ્યા મુજબ ત્રણેય વિદ્યાર્થીઓ એક જ રૂમમાં રહેતા હતા. અકસ્માત સમયે ચાર જણા કારમાં સવાર હતા. ત્રણના મોત અને અન્ય એકની હાલત હજુ પણ ગંભીર બતાવવામાં આવી રહી છે. જેનિશ રાણા એન્જિનિયરીંગની સ્ટડી માટે કેનેડા ગયો હતો. જેનિશના પિતા દહેજ ખાતે નોકરી કરે છે. જેનિશે ફેસબૂક પર કારના બોનેટ પર સવાર થઈને પોસ્ટ કરેલા ફોટોમા કેપ્શનમાં લખ્યું હતું કે લાઈફ ઈઝ શોર્ટ ફોર બેડ વાઈબ્સ.